नेकपा एमाले उपमहासचिव पृथ्वी सुब्बा गुरुङले मंसिर ४ गते हुने चुनावमा एमालेले गठबन्धन बनाउने संकेत गरेका छन् । गठबन्धन गर्नु हुँदैन भनेर ढोका बन्द नगरिएको उनले स्पष्ट गरे । 

मंगलवार बसेको एमाले स्थायी कमिटी बैठकपछि पत्रकारहरूसँग कुरा गर्दै प्रचार विभाग प्रमुख पृथ्वी सुब्बा गुरुङले एजेण्डा मिल्नेसँग कुरा भइरहेको बताएका हुन् । तर, उनले कुन–कुन दलसँग कुरा भइरहेको छ भन्ने खुलाएनन् । 

‘आगामी सरकार नेकपा एमालेको बहुमतको सरकार बनाउने रणनीतिअनुसार राजनीतिक प्रतिवेदन तयार हुँदैछ’ गुरुङले भने, ‘गठबन्धन गर्नु हुँदैन भनेर ढोका बन्द गरेका छैनौँ, एक्लैले चुनाव जित्न सक्छौँ । एजेण्डा मिल्नेसँग कुरा भइरहेको छ ।’ 

कोसँग गठबन्धन हुँदैछ भन्ने पत्रकारको प्रश्नमा गुरुङले भने, ‘यो झ्याली पिटाउँदै हिँड्ने विषय होइन ।’ 

मंगलवार बसेको एमाले स्थायी कमिटी बैठकले शुक्रवार बस्ने केन्द्रीय कमिटी बैठकको एजेण्डा तय गरेको छ ।