सूचना तथा सञ्चार प्रविधि क्षेत्रको प्रतिष्ठित अवार्डको रूपमा परिचित आईसीटी अवार्डको सातौँ संस्करणका लागि विभिन्न १२ विधामा अनलाइन नोमिनेशन (आवेदन), यहि भदौ १५ गते बुधवारसम्म बुझाउन सकिने छ ।  

लिभिङ विथ आईसीटीको आयोजना र विभिन्न राष्ट्रिय तथा अन्तर्राष्ट्रिय संस्थाहरूको सहकार्यमा आयोजनामा हुन लागेको ‘आईसीटी अवार्ड २०२२’ मा पहिलोपटक दक्षिण एसियाली देशहरूलाई लक्षित गरेर ‘साउथ एसिया स्टार्टअप आईसीटी अवार्ड’ पनि आयोजना हुनेछ । यसैगरी नेपालको लागि स्टार्टअप आईसीटी अवार्ड, प्रडक्ट आईसीटी अवार्ड, राइजिङ स्टार इन्नोभेसन आईसीटी अवार्ड गरी ३ विधाहरू स्टार्टअप तथा इन्नोभेसन सम्वन्धित विधाहरू रहेका छन् । 
प्रविधिको क्षेत्रमा विशेष योगदान गरेका व्यक्तिहरूलाई दिइने अवार्डका विधाहरूमा पायोनियर आईसीटी अवार्ड, आन्टरप्रेनर आईसीटी अवार्ड, नेपाली डायस्पोरा आईसीटी अवार्ड र वुमन आइकन आईसीटी अवार्ड रहेका छन् । यसैगरी प्रविधिको प्रयोगमार्फत उत्कृष्ट सेवा दिने सरकारी तथा निजी संस्थाहरूलाई प्रदान गरिने अवार्डहरूमा डिजिटल एजुकेशन आईसीटी अवार्ड (पब्लिक सेक्टर), डिजिटल एजुकेशन आईसीटी अवार्ड (प्राइभेट सेक्टर), डिजिटल गभर्नेन्स आईसीटी अवार्ड र डिजिटल सर्भिसेस आईसीटी अवार्ड रहेका छन् । अवार्डमा नोमिनेशन गर्न आईसीटी अवार्ड डटओआरजी वेबसाइटमा गएर विधा छनोट गरी अनलाइन फारम बुझाउनुपर्ने आयोजकले बताएको छ । 

आईसीटी अवार्ड २०२२ को ग्राण्ड फिनाले २०७९ पुस ८ गते द सोल्टी काठमाडौंमा आयोजना हुनेछ । यसैगरी प्रि इभेन्ट क्याम्पियनको रूपमा कार्तिक तेस्रो साता देशैभरिका १०० भन्दा बढी डिजिटल स्टार्टहरूको प्रदर्शनी तथा मेन्टरिङ सेसनको रूपमा स्टार्टअप एण्ड आइडिया फेस्ट कार्यक्रम आयोजना हुनेछ । विभिन्न १२ विधामा हुने छनोट प्रकृयाको लागि १२ जना विज्ञ जुरी सदस्य र १५ बढी विशिष्ट सल्लाहकार समिति गठन गरिएको छ । 

आईसीटी अवार्ड प्रविधिको क्षेत्रमा काम गर्ने व्यक्ति, संस्था, कम्पनी, विद्यार्थी र इन्नोभेसनहरूलाई सम्मान र प्रोत्साहन गर्ने नेपालको सबैभन्दा भब्य एवं प्रतिष्ठित प्लाटफर्म हो । यसमा सहभागी स्टार्टअप, इन्नोभेटर तथा नयाँ प्रोडक्टहरू विकास गरेका व्यक्ति तथा सस्थालाई विभिन्न किसिमले सहयोग गर्ने, लगानीको वातावरण बनाउने र अन्तराष्ट्रिय प्लाटफर्महरूमा समेत सहभागी गराउदै स्टार्टअप इकोसिस्टमको विकासमा महत्वपूर्ण भुमिका निवार्ह गरिरहेको छ । 

यसैगरी डिजिटल गर्भनेन्स, एजुकेशन र सर्भिसेस मार्फत डिजिटल रुपान्तरण र यसको इकोसिस्टमको विकासमा योगदान दिइरहेको आयोजकले जनाएको छ । अवार्ड विजेताहरूले विशिष्ट सम्मानसँगै विभिन्न सेवा र सुविधाहरू प्राप्त गर्नेछन् । स्टार्टअप विधाका विजेताले १५ लाखसम्मको सहुलियतपूर्ण ऋण सुविधा र लगानीको अवसरसमेत प्राप्त गर्ने आयोजकले जनाएको छन् । यस कार्यक्रममा विभिन्न राष्ट्रिय तथा अन्तराष्ट्रिय संघ सस्थाहरूको सहकार्य रहँदै आएको छ ।