२८ जेठ २०८३, बिहीबार
यही भदौ २१ गतेदेखि काठमाडौंमा हुन लागेको साफ महिला च्याम्पियनसीप २०२२ को तयारी पूरा भएको छ । भदौ २१ देखि असोज ३ गतेसम्म सञ्चालन हुने प्रतियोगिताको सबै तयारी पूरा भएको अखिल नेपाल फुटबल संघ (एन्फा)ले जानकारी दिएको छ ।
शुक्रवार आयोजित पत्रकार सम्मेलनमा एन्फा प्रवक्ता सुरेश शाहले प्रतियोगितामा सहभागी टिमहरू नेपाल आउने क्रम जारी रहेको जानकारी दिए । उनले हालसम्म भुटान र पाकिस्तानको टिम काठमाडौं आइसकेको जानकारी दिएका छन् । बाँकी सबै टिम आइतवारसम्ममा काठमाडौं आइपुग्ने उनले बताए ।
प्रतियोगितामा नेपालसहित भारत, श्रीलंका, भुटान, बंगलादेश, पाकिस्तान र माल्भिभ्स गरी ७ राष्ट्रका महिला राष्ट्रिय फुटबल टोलीको सहभागिता रहने छ ।
सहभागी टोलीहरूलाई दुई समूहमा विभाजन गरी लिगकम नकआउट प्रणालीका आधारमा खेल खेलाइने एन्फाले जानकारी दिएको छ । समूह ‘ए’ मा नेपाल, श्रीलंका र भुटान तथा समूह ‘बी’ मा भारत, बंगलादेश, पाकिस्तान र माल्दिभ्स रहेका छन् । दुवै समूहबाट अंकको आधारमा पहिलो र दोस्रो स्थानमा रहने टिमले सेमिफाइनल प्रवेश गर्नेछन् ।
एन्फाले प्रतियोगिता सञ्चालनका लागि उपाध्यक्ष वीरबहादुर खड्काको संयोजकत्वमा १९ सदस्यीय मूल आयोजक समिति गठन गरेको छ । प्रतियोगिता सञ्चालनका लागि कुल ३ करोड ४७ लाख ६७ हजार ६८० रुपैयाँ खर्च हुने एन्फाले जनाएको छ ।
एन्फाको नयाँ पदाधिकारी चयन भएपछि हुन लागेको यो पहिलो अन्तर्राष्ट्रिय प्रतियोगिता हो ।
