०८ साउन २०८३, शुक्रबार
सन् २०२४ मा भारतको लोकसभा निर्वाचन हुँदैछ ।
त्यसमा सत्तारूढ भारतीय जनता पार्टीले प्रधानमन्त्री नरेन्द्र मोदीकोे नेतृत्वमा नै चुनाव लड्नेछ ।
तर उनको प्रतिस्पर्धामा विपक्षी गठबन्धनबाट को प्रधानमन्त्री पदको उम्मेदवार बन्ने स्पष्ट छैन । कहिले ममता बनर्जीको नाम आउँछ भने कहिले शरद पवारको ।
बिहारका मुख्यमन्त्री नीतीश कुमारले पनि प्रधानमन्त्री पदमा आकांक्षा व्यक्त गरेका छन् । उनको पार्टी जनता दल युनाइटेडको कार्यालयमा उनलाई प्रधानमन्त्री बनाउनुपर्ने आशयसहितको पोस्टर टाँसिएको छ ।
एउटा पोस्टरमा यस्तो लेखिएको छ, ‘प्रदेशमा देखिए, अब देशमा देखिनेछन् ।’ अर्को पोस्टरमा लेखिएको छ, ‘जुमला (गफ) हैन, यथार्थ ।’ अनि अर्कोमा, ‘आश्वासन हैन, सुशासन ।’
त्यसो त जदयूले स्पष्ट रूपमा नीतीशलाई प्रधानमन्त्री पदको उम्मेदवारका रूपमा पेश गरेको छैन । तर उनको नाममा सहमति जनाउन कोशिश चाहिँ गरेको छ ।
यसैबीच तेलंगानाका मुख्यमन्त्री चन्द्रशेखर राव बिहार पुगेर नीतीशसँग भेटघाट गरेका छन् । पत्रकारहरूसँग कुराकानी गर्दै उनले नीतीश सर्वोत्कृष्ट नेता भएको बताए । उनको त्यो भनाइले नीतीशको प्रधानमन्त्री पदमाथिको दाबीलाई बलियो बनाएको बताइँदैछ ।
तर विपक्षीहरूको एकताका लागि नीतीशले प्रधानमन्त्री पदमा दाबी छोड्न पनि सक्ने जदयूका नेताहरू बताउँछन् ।
