प्रतिनिधि सभाको बैठक आज (बुधवार) बस्दै छ ।

बुधवार दिउँसो १ बजे बस्ने बैठकमा चर्चामा रहेको मिडिया काउन्सिल विधेयकमाथि छलफल हुने सम्भावित कार्यसूची रहेको छ । 

जसका लागि सञ्चार तथा सूचना प्रविधि मन्त्री ज्ञानेन्द्रबहादुर कार्कीले राष्ट्रिय सभाको सन्देश सहितको ‘नेपाल मिडिया काउन्सिल विधेयक, २०७६ माथिको दफावार छलफल सदनमा गरियोस्’ भनी प्रस्ताव प्रस्तुत गर्नेछन् । 

त्यसपछि सो विधेयकमाथि प्राप्त संशोधनहरूलाई निर्णयार्थ प्रस्तुत गरिने सम्भावित कार्यसूची छ ।

मन्त्री काकीले नेपाल मिडिया काउन्सिल विधेयक, २०७६ लाई पारित गरियोस् भनी प्रस्ताव प्रस्तुत गर्ने कार्यसूची पनि आज नै छ । 

यसबाहेक प्रतिनिधि सभामा बुधवार भीमबहादुर रावलले ‘माथिल्लो कर्णाली जलविद्युत आयोजना विकास सम्झौताको कार्यान्वयन गर्न गराउन तथा जलविद्युतको धनी राष्ट्र नेपालमा रहेको जलस्रोत क्षमताको राष्ट्रिय हितमा प्रयोग हुने गरी संरक्षण र सर्वद्धन गर्न आवश्यक भएकोले’ भन्ने जरुरी सार्वजनिक महत्वको विषयमाथि ऊर्जा, जलस्रोत तथा सिंचाई मन्त्रीको ध्यानाकर्षण गराउने सम्भावित कार्यसूची छ ।

उक्त ध्यानाकर्षणको सम्बन्धमा यज्ञबहादुर बोगटी र राजबहादुर बुढा क्षेत्रीले स्पष्टीकरण माग गर्ने सम्भावित कार्यसूची रहेको प्रतिनिधि सभाका सचिव गोपालनाथ योगीले जानकारी दिएका छन् ।