०९ असार २०८३, मंगलबार
काठमाडौं, १७ साउन — चीनको जनमुक्ति सेनाले महिलाहरूको विशेष टुकडी तयार गरेको छ । यो टुकडीले अग्ला पहाडका चिसा ठाउँ र चर्को समुद्री लहर जस्ता अत्यन्त अप्ठ्यारा स्थितिहरूमा पनि कारवाही गर्न सक्छन् ।
यी महिला सैनिकलाई लडाईंका मैदानमा तैनाथ गर्ने हो कि होइन भनी जनमुक्ति सेनाले जानकारी दिएको छैन ।
आज मंगलवार जनमुक्ति सेनाले ९० वर्ष पूरा गरेको छ ।
यो टुकडीमा समावेश भएकी २० वर्षीया वी लिङ्लीले स्थानीय सञ्चारमाध्यमसँग कुरा गर्दै भनिन्, ‘हामी बलिया महिला हौं । विशेष तालिम लिँदा मेरो शरीरको आकारप्रकार हल्का बदलियो होला तर मांसपेशी चाहिँ दह्रो भएको छ ।’
चिनियाँ सेनाले पछिल्लो केही समययता महिला सैनिक र अधिकारीहरूसँग जोडिएको रणनीतिमा धेरै परिवर्तन ल्याएको छ । शुरुवातमा महिलाहरूलाई सेनाको परेडमा शोभा बढाउनका लागि मात्र समावेश गरिन्थ्यो ।
तर अहिले आएर महिलालाई राम्रो स्थान दिइएको छ । सन् २०१३ मा त महिलाहरूको विशेष टुकडी नै बनाइयो । टुकडीमा कति महिला छन् भन्ने प्रस्ट छैन ।
वी भन्छिन्, ‘कहिलेकाहीँ मानिसहरू हाम्रो मजाक पनि उडाउँछन् । कुनै पनि पुरुषले यति बलिया महिलासँग बिहे गर्ने हिम्मत राख्दैनन् भन्छन् । तर हामी दृढ संकल्प र मजबूत मुटुका साथ आएका छौं । अप्ठ्यारो बेलामा हामीहरू आत्तिँदैनौं, अघि बढ्छौं ।’
एजेन्सी
