२५ जेठ २०८३, सोमबार
माध्यमिक विद्यालय शिक्षक युनियन नेपालले थप आन्दोलनको घोषणा गरेको छ। बिहीबार पत्रकार सम्मेलन गरेर युनियनले विभिन्न १६ बुँदे माग अघि सार्दै सशक्त आन्दोलन घोषणा गरेको हो ।
सरकार संघीय शिक्षा ऐन बनाउने प्रक्रियामा रहँदै गर्दा साविक उमावि शिक्षक र शिक्षाको भविष्य पनि त्यही ऐनमाथि निर्भर रहेको युनियनले उल्लेख गरेको छ । तर, ऐन बनाउँदा विगत ३० वर्षदेखि अध्यापनरत शिक्षकहरुको समस्या समाधान गरिनुपर्ने उनीहरुको माग छ ।
साविक उच्च माध्यमिक विद्यालयको संख्या ३ हजार ५०० भन्दा बढी रहेको र त्यसमा ७ लाख भन्दा बढी विद्यार्थी अध्ययनरत भएपनि अहिलेसम्म १ जनापनि स्थायी शिक्षकको व्यवस्था नहुनु बिडम्बनाको विषय भएको युनियनका अध्यक्ष दीपकराज सुवेदी र महासचिव टीकाप्रसाद न्यौपानेले जारी गरेको विज्ञप्तिमा उल्लेख छ ।
१६ बुँदे माग पुरा गर्नका लागि दवाव दिन भाद्र २६ र २७ गते संघीय सांसदहरुलाई ज्ञापनपत्र बुझाउने, २८ गते कालोपट्टी बाँधी अध्यापन गर्ने, ३० गते पेन डाउन गर्ने र त्यसपछि पनि माग पूरा नभए चुनावपछि काठमाडौं केन्द्रीत आन्दोलन गर्ने युनियनको भनाइ छ ।
विज्ञप्ति हेर्नुहोस्
