चीनका राष्ट्रपति सी चिनपिङ बुधवार कजाकस्तान पुगेका छन् । 

कोभिड महामारी शुरू भएदेखि पहिलोपटक उनले विदेशयात्रा गरेका हुन् । 

कजाकस्तानमा उनले शांघाई कोअपरेसन अर्गनाइजेसन शिखर सम्मेलनका क्रममा रुसका राष्ट्रपति भ्लादिमिर पुटिनलाई भेट्नेछन् । 

सीको यस भ्रमणबाट रुस तथा मध्य एसियालाई चीनले महत्त्व दिएको देखिन्छ । अमेरिकासँगको तनावमा हावी हुन तथा आफ्नै रणनीतिक महत्त्वाकांक्षा साकार पार्र्न चीनको सत्तारूढ कम्युनिस्ट पार्टीले गैरपश्चिमी मुलुकहरूसँगको सहकार्यमा जोड दिइरहेको छ । 

नीलो सुट लगाएका सीलाई विमानस्थलमै गएर कजाकस्तानका राष्ट्रपति कासिम–जोमार्ट टोकाएभले स्वागत गरेका थिए । 

दुई नेताबीच ऊर्जा बजार तथा विश्वव्यापी आर्थिक संकटका विषयमा छलफल हुने कजाकस्तान सरकारले जनाएको छ । 

बिहीवार सी उज्बेकिस्तानको समरकन्द जानेछन् । त्यहाँ एससीओको शिखर सम्मेलन आयोजना गरिँदैछ । 

त्यहाँ उनले पुटिन तथा भारतका प्रधानमन्त्री नरेन्द्र मोदीलाई भेट्ने कार्यक्रम छ ।