‘लोकान्तर राउण्ड अप’ मा पाठकवृन्दलाई स्वागत छ । सधैँझैँ आज पनि हामी बितेका २४ घण्टाका मुख्यमुख्य घटनाक्रमसहित उपस्थित भएका छौँ–
महाभियोग सिफारिस समितिले निलम्बित प्रधानन्यायाधीश चोलेन्द्रशमशेर जबरालाई शुक्रबार पूरक प्रश्न सोध्ने भएको छ । बिहीबार बसेको बैठकले समितिको बैठकले चोलेन्द्रलाई शुक्रबार पूरक प्रश्न सोध्ने निर्णय गरेको एक सदस्यले जानकारी दिए । 

बिहीबार महाअभियोग सिफारिस समितिले जबराले बयानका क्रममा केही अधिवक्ताहरूलाई विभिन्न आरोप लगाएपछि उनीहरुसँग छलफल गरेको छ ।  समितिमा बयानका लागि अधिवक्ताहरू चन्डेश्वर श्रेष्ठ, शम्भु थापा, ओमप्रकाश अर्याल, पूर्णमान शाक्यलगायत उपस्थित थिए ।
००००
निर्वाचन आयोगले राष्ट्रिय भूमि आयोगलाई लालपूर्जा वितरण गर्ने लगायतका सम्पूर्ण कार्यहरु स्थगित गर्न निर्देशन दिएको छ । यस्तै नेपाल सरकार, प्रदेश सरकार, तथा स्थानीय तहलाई वैदेशिक भ्रमण नगर्न नगराउन पनि आयोगको निर्देशन दिएको छ ।  

आयोगले बिहीबार जारी गरेको विज्ञप्तिमा प्रदेश तथा प्रतिनिधिसभाको निर्वाचन कार्यक्रमहरू सार्वजनिक भइसकेको सन्दर्भमा यस्तो निर्देशन दिइएको उल्लेख छ । आयोगले निर्वाचन सम्पन्न नभएसम्मका लागि आफू र आफ्नो मातहतबाट हुने र भइरहेका जग्गा वितरण सम्बन्धी निवेदन लिने, जग्गा नापजाँच गर्ने र जग्गाको निस्सा तथा लालपूर्जा वितरण गर्ने लगायतका सम्पूर्ण कार्यहरु तत्काल स्थगित गरी सोको यथार्थ जानकारी दुई दिनभित्र निर्वाचन आयोगलाई दिन राष्ट्रिय भूमि आयोग, ताहाचल, काठमाडौंलाई निर्देशन दिएको छ ।
००००
बलात्कार आरोप लागेका क्रिकेटर सन्दीप लामिछानेलाई प्रहरीले खोजी गरिरहेको छ । सन्दीप कहाँ छन् भन्ने विषयमा स्पष्ट जानकारी नभएको प्रहरीको दाबी छ । 
काठमाडौं प्रहरी परिसरका प्रवक्ता प्रहरी उपरीक्षक दिनेशराज मैनालीले सन्दीप कहाँ छन् भन्ने जानकारी नभएकाले उनको खोजी भइरहेको बताए । ‘सन्दीप लामिछाने कहाँ छन् भन्ने थाहा छैन्  हामीले पनि खोजिरहेका छौँ,’ एसपी मैनालीले भने ।

सन्दीप विदेशमा रहेको र नेपाल आउने बित्तिकै पक्राउ पर्ने मैनालीले बताए । उनी नेपाल नआएको खण्डमा पक्राउ गरेर ल्याउने विभिन्न माध्यम भएको प्रहरी अधिकारीहरू बताउँछन् ।
सन्दीपनिकट स्रोतले दिएको जानकारी अनुसार, उनी कानूनी लडाइँ कसरी लड्ने भन्ने बारेमा कानून व्यवसायीसँग परामर्श गरिरहेका छन् । अहिले उनी युनाइटेड अरब इमिरेट्सको दुबईमा रहेर कानून व्यवसायीसँग सम्पर्कमा छन् ।
००००
नेपाली कांग्रेसले समानुपातिकतर्फका उम्मेदवारको सूची बनाउने जिम्मा सह–महामन्त्रीहरूलाई दिएको छ । पार्टीको महाधिवेशनमा समावेशिताको आधारमा विभिन्न क्लष्टरबाट चुनिएका सह महामन्त्रीहरूलाई आफ्नो क्लष्टरको उम्मेदवार छान्ने जिम्मा दिइएको हो ।
००००
वीर अस्पतालले घरबहाल करको रकम काठमाडौं महानगरपालिकालाई तिर्ने भएको छ । यसअघि केन्द्र सरकारलाई कर तिर्दै आएको अस्पतालले चालु आर्थिक वर्षको साउन १ गतेदेखि महानगरपालिकालाई तिर्ने भएको हो । 
००००
जग्गाको कित्ता काट रोकिए कारण नागरिकलाई समस्या भएपछि जनकपुरधाम उपमहानगरपालिका खोल्ने तयारीमा जुटेको छ । उपमहानगरपालिकाका प्रमुख मनोजकुमार साहले जग्गाको कित्ता काट रोकिएका कारण जनता मारमा परेका कारण खोल्ने तयारीमा जुटेको बताए ।
००००
नेपाल टेलिकमले दूरसञ्चार कार्यालय सुन्धारा काउन्टरबाट शुक्रबारदेखि ग्राहकहरुलाई निःशुल्क ई–सिम वितरण प्रारम्भ गर्ने भएको छ । ई–सिम सपोर्ट गर्ने मोबाइल सेट भएका ग्राहकहरुले उक्त नयाँ प्रविधिको सिम प्रयोग गर्न सक्ने टेलिकमले जनाएको छ ।
००००
माथिल्लो अरुण जलविद्युत् आयोजनामा नेपालका बैंक तथा वित्तीय संस्थाले रु ५३ अर्ब ३४ करोड बराबर लगानी गर्ने भएका छन् । सरकारले रूपान्तरणकारी आयोजनाका रूपमा राखेको सो परियोजनाको कूल लागत रु दुई खर्ब १४ अर्ब ८६ करोड बराबर रहेको छ । आन्तरिक ऋण लगानीसम्बन्धी सम्झौतामा बिहीबार साँझ हस्ताक्षर भएको छ ।
००००
मोबाइल डिभाइस म्यानेजमेन्ट सिस्टम एमडीएमएस लागू भएको । विदेशबाट अवैध रुपमा आयात भएका मोबाइलको प्रयोगमा प्रतिबन्ध लगाउने उद्देश्यसहित नेपाल दूरसञ्चार प्राधिकरणले बिहीवारदेखि एमडीएमएस कार्यान्वयन गरेको हो ।
००००
नेपाल भ्रमणमा रहेका जनवादी गणतन्त्र चीनका राष्ट्रिय जनकंग्रेसका अध्यक्ष ली चान्शु स्वदेश फर्किएका छन् ।  चार दिने औपचारिक भ्रमण सकेर उनी बिहीबार बिहान स्वदेश फर्किएका हुन् ।
००००
काठमाडौं महानगरपालिकाले सकड पेटीमा व्यापार गर्न नदिएपछि महानगरपालिकाविरूद्ध काठमाडौंमा प्रदर्शन भएको छ । नेपाल स्वरोजगार व्यापार श्रमिक संघले काठमाडौंको भृकुटी मण्डपबाट विरोर्ध याली शुरू गरेको र काठमाडौं महानगरपालिका कार्यालय अगाडी पीडितहरूले धर्ना दिने बताएका छन् ।
००००
नेकपा माओवादी केन्द्रका अध्यक्ष पुष्पकमल दाहालले माओवादी केन्द्र आगामी प्रदेश र प्रतिनिधि सभाको निर्वाचनमा पहिलो कम्युनिष्ट पार्टी बन्ने दाबी गरेका छन्  । बिहीवार पार्टी कार्यालयमा आयोजित पोष्टबहादुर बोगटीको स्मृति दिवसलाई सम्बोधन गर्दै उनले माओवादीलाई नै जनताले देशको चाबी सुम्पिन चाहेको स्पष्ट भएको बताए ।
००००
वाणिज्य बैैंकहरूले दशैंको महिना लागेपछि अर्थात असोजबाट ब्याजदर बढाउने भएका छन् । हाल बैंकहरूले दिइरहेको भन्दा डेढ प्रतिशत विन्दूसम्मले ब्याजदर बढ्ने भएको छ । बिहीवार बसेको नेपाल बैंकर्स संघको बैठकले बैंकहरूलाई ब्याजदर बढाउन दिने निर्णय गरेको छ ।
००००
नेपाली सेनाले पुरानो पृतनालाई ब्युँताउने भएको छ । भदौ २१ गते बसेको मन्त्रिपरिषद् बैठकले पृतना संरचनालाई ब्युँताउने निर्णय गरेको हो ।
००००
परराष्ट्र मन्त्रालयले दशैं अघि नै चिनियाँ नाका पूर्णरूपमा सञ्चालनमा आउने बताएको छ । बिहीवार मन्त्रालयमा आयोजित नियमित पत्रकार सम्मेलनमा सहसचिव एवं प्रवक्ता सेवा लम्सालले अहिले बन्द रहेको उत्तरी नाका दशैं अघि नै पूर्ण सञ्चालनमा आउने बताएकी हुन् ।
००००
विदेशी मुद्राको सञ्चिति घटेको भए पनि आयात धान्ने क्षमता भने बढेर ८ महिनासम्म पुगेको छ । नेपाल राष्ट्र बैंकले बिहीवार सार्वजनिक गरेको देशको वर्तमान आर्थिक तथा वित्तीय स्थितिको तथ्यांकअनुसार डलर सञ्चिति १.५ प्रतिशतले घटेको छ ।
००००
राष्ट्रिय सभा बैठकले तीनवटा विधेयक पारित गरेको छ । बिहीवार दुई चरणमा बसेको राष्ट्रिय सभा बैठकले प्रतिनिधि सभाबाट सन्देशसहित प्राप्त तीनवटा विधेयक पारित गरेको हो । 
पारित भएका विधेयकहरुमा पशु स्वास्थ्य तथा पशु सेवा परिषद् विधेयक २०७६, बीमा विधेयक २०७५ र सार्वजनिक ऋण व्यवस्थापन विधेयक, २०७६ रहेका छन् । राष्ट्रिय सभा अध्यक्ष गणेशप्रसाद तिमिल्सिनाले यी विधेयकहरू पारित भएको घोषणा गरे ।