२२ जेठ २०८३, शुक्रबार
धनगढी विमानस्थलको धावनमार्गमा जहाज अवतरण गर्नै लाग्दा स्याल दौडिएपछि सौर्य एयरलाइन्सको जहाजले ‘ओभर सुट’ (पुन आकाशमै फर्काउने काम) गरेको छ । काठमाडौंबाट गएको सौर्य एयरलाइन्सको जहाज अवतरण गर्नै लाग्दा स्याल देखेपछि चालक दलले जहाज ‘ओभर सुट’ गरेको थियो । त्यसपछि विमानले विमानस्थललाई एक फन्को मारेर पुनः अवतरण गरेको धनगढी विमानस्थल कार्यालयले जानकारी दिएको छ ।
विमानस्थलका अनुसार दुई मिनेटमै जहाजले एक फन्को मारेर आएको र त्यतिबेलासम्म स्याल भागिसकेकाले सफल अवतरण गरिएको थियो ।
स्यालका कारण विमानस्थलमा कुनै अवरोध नभएको र विमानस्थलमा हुने उडान सबै नियमित रहेको पनि विमानस्थल कार्यालयले जानकारी दिएको छ ।
वन्यजन्तुले त्रिभुवन विमानस्थलदेखि विभिन्न आन्तरिक विमानस्थलमा बेला–बेलामा दुःख दिने गरेको छ । सामान्यतया वर्षातको समयमा विमानस्थल वरपर झाडी हुने हुँदा वन्यजन्तु र कहिलेकाँही चराले पनि दुःख दिने गरेको छ ।
