मध्य रुसको इजेभस्क शहरको एक विद्यालयमा गोली चलेको छ । उक्त गोली काण्डमा कम्तिमा १३ जनाको मृत्यु हुनुको साथै अन्य २२ घाइते भएको बीबीसीले जनाएको छ । मारिनेमध्ये ७ जना उक्त विद्यालयका बालबालिका रहेको जनाइएको छ । 

पीडितहरूको विषयमा हाल विस्तृत विवरण भने प्राप्त नभएको पनि मन्त्रालयले थप जानकारी दिएको छ । गोली चलाउने व्यक्तिको शव अहिले प्रहरीले फेला पारेको बताइएको छ । उक्त शहरका गभर्नर अलेक्जेन्डर ब्रेचालोभले मृत्यु हुनेमा बालबालिका रहेको पुष्टि गरेका छन् । 

रुसी अधिकारीहरुका अनुसार ७ बालबालिका र ६ जना वयस्कको मृत्यु भएको थियो ।त्यसमध्ये २ सुरक्षा गार्ड र २ शिक्षक रहेकाे जनाइएकाे छ । विद्यालय भवनबाट कर्मचारी र विद्यार्थीलाई बाहिर निकालिएको छ । उक्त विद्यालयमा झण्डै १ हजार बालबालिका अध्ययनरत रहेको बताइएको छ ।  

आक्रमणकारीले विद्यालयमा गोली चलाएपछि आफूले पनि त्यही आत्महत्या गरेको समाचारमा जनाइएको छ  । उनी विद्यालयका पूर्व विद्यार्थी रहेको बताइएको छ । रसियाली मिडियाले भिडियो पोस्ट गरेका छन्, जसमा गोलीबारी भएको भवनभित्र आतंक देखिएको छ । केही फुटेजहरूमा कक्षाकोठाको भुइँमा रगत र झ्यालमा गोलीको प्वाल देखिन्छ  । बच्चाहरू डेस्कको मुनि लुकिरहेका छन् । 

अनुसन्धान समितिले अनलाइन पोस्ट गरेको एक भिडियोमा नाजी चिन्ह र बालाक्लाभा भएको टी–सर्ट लगाएको बन्दुकधारी भुइँमा मृत अवस्थामा लडिरहेको देखाइएको छ । अनुसन्धानकर्ताहरूले उनको बसोबास गर्ने ठाउँको खोजी गरिरहेका छन् ।

घटनापछि उक्त प्रदेशका प्रमुखले सेप्टेम्बर २९ सम्मको शोक अवधिको घोषणा गरेका छन् । रुसी राष्ट्रपति भ्लादिमिर पुटिनका प्रवक्ताले आक्रमणप्रति गहिरो शोक व्यक्त गरेका छन् ।