०१ साउन २०८३, शुक्रबार
विशेष अदालतले सिभिल सहकारीका अध्यक्ष इच्छाराज तामाङ, उनकी पत्नी सिर्जना शाक्य र केशवलाल श्रेष्ठलाई थुनामा पठाउन आदेश गरेको छ । विशेष अदालतका शाखा अधिकृत विनोद अधिकारीका अनुसार अध्यक्ष श्रीकान्त पौडेल, सदस्यद्वय शालिग्राम कोइराला र खुशीप्रसाद थारुको इजलासले प्रतिवादी तीनै जनालाई मुद्दा पुर्पक्षको क्रममा कारागारमा थुनामा पठाउने आदेश दिएको हो ।
सम्पत्ति शुद्धीकरण अनुसन्धान विभागले सिभिल सहकारीका अध्यक्ष इच्छाराज तामाङ, उनका परिवारका सदस्य र आफन्तको नाममा रहेको अर्बौंको सम्पत्ति जफत गर्न माग दाबी गरेर विशेष अदालतमा मुद्दा दायर गरेको थियो ।
विभागले विशेष अदालतमा दायर गरेको मुद्दामा इच्छाराज तामाङ, उनकी श्रीमती सिर्जना शाक्य (तामाङ), छोरीहरू प्रतिक्षा तामाङ र प्रतिष्ठा तामाङ, मामाससुरा केशवलाल श्रेष्ठ (सिभिल सहकारीका तत्कालीन अध्यक्ष) एवं माइजू सासू (केशवलालकी पत्नी) मीनाकुमारी श्रेष्ठका नाममा रहेको झण्डै ५ अर्ब बराबरको चल–अचल सम्पत्ति जफत गर्न माग दाबी लिइएको छ ।
विभागले इच्छाराजविरुद्ध ३ अर्ब ३१ करोड ८५ लाख ९२ हजार ९४२, पत्नी सिर्जनाको नाममा १ अर्ब ३० करोड ९३ लाख ९५ हजार ८०२, छोरीहरू प्रतिक्षाको नाममा ६ करोड ४७ लाख ४६ हजार २५० र प्रतिष्ठाको नाममा १ करोड ८९ लाख १८ हजार ६४६ रुपैयाँ बिगो कायम गरेको छ ।
यस्तै, उनका मामा–सुसरा पर्ने केशवलालको नाममा २६ करोड ६१ लाख ४५ हजार ५३० तथा माइजूसासू मीनासमेतको नाममा गरी कूल ४ अर्ब ९७ करोड ७७ लाख ९९ हजार १७२ रुपैयाँ बिगो माग दाबी गरिएको छ ।
