१७ असार २०८३, बुधबार
रुसले आणविक फौजहरूको अभ्यास गर्न लागेको विषयमा अमेरिकी अधिकारीहरूलाई आधिकारिक जानकारी दिएको अमेरिकी रक्षा मन्त्रालय पेन्टागनले जनाएको छ ।
अहिले अमेरिका नेतृत्वको पश्चिमी सैन्य गठबन्धन नेटोले स्टेडफास्ट नून नामक आणविक अभ्यास गरिरहेको छ ।
‘अमेरिकालाई रुसले जानकारी दिएको र हामीले पहिले पनि भने जस्तै यो रुसको नियमित वार्षिक अभ्यास हो,’ अमेरिकी वायुसेनाका प्रवक्ता ब्रिगेडियर जनरल प्याट्रिक राइडरले मंगलवार बताए ।
अमेरिकी सेनाले यस विषयमा थप जानकारी दिएको छैन । तर रुसले हतियार नियन्त्रण दायित्व तथा अर्को पक्षलाई सूचना दिने भनी गरेको पारदर्शिताको प्रतिबद्धतालाई पालन गरेको स्वीकार गरेको छ ।
रुसको रक्षा मन्त्रालयले आणविक अभ्यासको मिति र दायराका विषयमा आधिकारिक बयान दिइसकेको छैन । यस्ता अभ्यासमा आणविक क्षमतायुक्त तथा गैरआणविक दुवैथरी हतियार उपयोग गरिन्छन् । रणनीतिक निवारण बल तथा पूरै सैन्य मर्यादाक्रमको तयारी अवस्था जाँच्नका लागि व्यापक अभ्यास गरिन्छ ।
युक्रेनविरुद्ध युद्ध शुरू गर्नुअघि फेब्रुअरी महिनामा रुसले यस्तै किसिमको अभ्यास गरेको थियो ।
नेटोले गरिरहेको स्टेडफास्ट नून आणविक अभ्यास अक्टोबर ३० सम्म जानेछ र त्यो बेल्जियम, उत्तरी सागर तथा बेलायतमा भइरहेको छ । नेटोले पनि यो नियमित अभ्यास भएको बताएको छ ।
