१४ असार २०८३, आइतबार
अमेरिकी सेनाले आणविक बम बोक्न सकने बी–५२ बमवर्षक विमान अस्ट्रेलियामा तैनाथ गर्ने योजना बनाएको एबीसी र रोयटर्सले सोमवार खबर दिएका छन् ।
चीनसँगको प्रतिस्पर्धामा अस्ट्रेलियाको उत्तरी भूभागलाई अमेरिकाले महत्त्वपूर्ण सैन्य केन्द्र बनाउन खोजेको संकेत यसबाट पाइएको छ ।
अमेरिकाको रक्षा मन्त्रालय पेन्टागनले स्क्वाड्रन अपरेसन्स फसिलिटी बनाउन खोजेको हो । त्यहाँ मर्मत केन्द्र पनि हुनेछ । अनि ६ वटा बी–५२ बमवर्षक विमान राख्न मिल्ने ठाउँ पनि पुग्नेछ । अस्ट्रेलियाको वायुसेनाको टिन्डाल एयरबेसमा विमानहरू राखिने योजना हो ।
एयरबेसको विस्तारका लागि १० करोड डलरसम्म खर्च गरिनेछ र सन् २०२६ सम्ममा निर्माण पूरा गरिने अपेक्षा छ । नयाँ केन्द्रहरूले १५ दिने प्रशिक्षण अभ्यासहरू धेरैपटक गर्नका लागि आवश्यक संरचना उपलब्ध गराउने बताइएको छ ।
अस्ट्रेलिया र अमेरिकाबीच पोहोर साल अस्मिन मन्त्रीस्तरीय बैठक भएको थियो र त्यसमा उनीहरूले वायुसेनाको क्षेत्रमा सहकार्य बढाउने बताएका थिए । सबै किसिमका अमेरिकी सैन्य विमानहरू चक्रीय आधारमा तैनाथ गरिने उनीहरूबीच सहमति बनेको थियो ।
अमेरिका र अस्ट्रेलियाले बेलायतसँग मिलेर अकस सम्झौता गरेका छन् । चीनलाई पश्चिमी प्रशान्तमा घेराबन्दी गर्नका लागि उक्त सम्झौता भएको हो ।
