अब वैदेशिक रोजगारीमा रहेका नेपालीलाई पनि प्राथमिक शेयर निष्काशन (आईपीओ) छुट्याउनुपर्ने भएको छ । संगठित संस्थाले आईपीओ जारी गर्दा १० प्रतिशत विदेशमा रहेका नेपालीलाई छुट्टयाउनुपर्ने व्यवस्था आजबाट लागू भएको हो ।

नेपाल धितोपत्र बोर्डले धितोपत्र निस्कासन तथा बाँडफाँट निर्देशिकालाई संशोधन गरी यस्तो व्यवस्था लागू गरेको हो ।

शेयर निष्कासन गर्दा बिक्री प्रबन्धकले सर्वसाधरणका लागि निष्कासन गर्नु १५ दिनअघि नै अवधि तोकेर आह्वान पत्र प्रकाशित गर्नु पर्ने व्यवस्था गरिएको छ । 

लगानीकर्ताले शेयरमा आवेदन दिँदा बोर्डबाट धितोपत्र खरीद दरखास्त संकलनसम्बन्धी कार्य गर्न अनुमति प्राप्त आस्वा सदस्य बैंक वा वित्तीय संस्थामा रहेको विप्रेषण (रेमिट्यान्स) बचत खाता मार्फत भुक्तानी गर्नुपर्ने छ ।

रेमिट्यान्स बचत खातामा पछिल्लो ६ महिनामा कम्तीमा ५० हजार रुपैयाँ सम्बन्धित व्यक्तिले आफू कार्यरत रहेको मुलुकबाट जम्मा गरेको हुनुपर्नेछ । विदेशमा रहेकाले डिम्याट खाता खोल्दा विद्युतीय माध्यमबाट समेत ग्राहक पहिचान विवरण रुजु गराउन सक्ने छन् । 

त्यसैगरी, सीआरएन पनि विद्युतीय माध्यममार्फत लिन सक्नेछन् । विदेशमा रहेकाले यो आरक्षित कोटामा आईपीओ भरिसकेपछि सर्वसाधारणका लागि छुट्याएकोमा भने भर्न पाउँदैनन् ।