२२ जेठ २०८३, शुक्रबार
राजु गिरीको निर्देशनमा निर्माण हुन लागेको चलचित्र ‘नम्बरी सुन’को मुख्य भूमिकामा अभिनेता आमेश भण्डारी अनुबन्धित भएका छन् । बिहीवार निर्माण टिम र आमेशबीच औपचारिक रूपमा लिखित सम्झौता भएको हो ।
निर्देशक गिरी ‘नम्बरी सुन’ झण्डै ७० वर्ष अगाडिको ऐतिहासिक सामाजिक कथामा निर्माण गर्न लागेको बताउँछन् । चुनावपछि मंसिर ७ गतेबाट फ्लोरमा जाने चलचित्रबाट लामो समयपछि द्धन्द्व निर्देशक राजेन्द्र खड्गी कमब्याक गर्दैछन् । चलचित्रका लागी अन्य कलाकार छनोटको चरणमा रहेको निर्माण टिमले जनाएको छ ।
सुवर्ण शिभान्स फिल्मसको ब्यानरमा निर्माण हुने चलचित्रको प्रस्तुतकर्ता, निर्माता, कथा र गीत नारायण खातीको रहनेछ । चलचित्रमा सन्तोष श्रेष्ठको संगीत, दिव्य सुवेदीको छायांकन, रामजी लामिछाने कोरियोग्राफी, निर्माता खातीको गीत रचना, शान्तिश्री परियार, प्रमोद खरेललगायतका गायक तथा गायिकाको स्वर रहनेछ ।
लमजुङको भुजुङ खोला, हेटौँडा, काठमाडौंका विभिन्न ठाउँमा चलचित्रको छायांकन गरिने निर्देशक गिरीले जानकारी दिए ।
