२८ असार २०८३, आइतबार
केही साताअघि औपचारिक निर्माण घोषणा गरिएको चलचित्र ‘बिजुली च्याप्टर १’मा केही कलाकारहरू अडिसनमार्फत छानिने भएको छ । आगामी २२ गते कान्तिपुर फिल्म एकेडेमीमा हुने अडिसनमा २५ देखि ३० वर्ष उमेरको पुरुष, ३० देखि ३५ वर्षको पुरुष र १८ देखि २८ वर्ष उमेरको महिला कलाकार र अन्य सहायक चरित्र छनोट गरिने भएको हो ।
विकास गिरीको लेखन तथा निर्देशनमा बन्न लागेको चलचित्र ‘बिजुली च्याप्टर १’को निर्माता लुना केसी हुन् । विकास गिरीको यो डेब्यू निर्देशन हो । लामो समयको तयारीपश्चात गिरीले निर्देशनमा पाइला चाल्न लागेको बताएका छन् ।
बाँसुकी फिल्मस्को प्रस्तती रहेको चलचित्रमा मुकुन भुसाल, बेनिशा हमाल, कालु राना अनुबन्ध भईसकेका छन् । अब, बाँकी कलाकार अडिसनमार्फत छानिने लागेको हो ।
क्रयटिभ प्रोडूसर केदार भुसाल रहने चलचित्रको छायाँकन माघबाट शुरु गरिने लक्ष्य निर्माण टिमको छ । हरि घले लामाले छायांकन गर्ने चलचित्रमा एसोसियट निर्देशक शंकर धिताल, मुख्य सहायक निर्देशक आयुष बिसी, प्रोडक्सन म्यानेजर नेत्र बिस्ट रहेका छन् । चलचित्रको पोस्टर डिजाइन ट्राईडेन्ट कन्सेप्टका रोयल भिमसेनले गरेका हुन् । चार युग सत्य, त्रेता, द्वापर र कलियुग युगको प्रतिनिधि पात्रको कथामा बन्न लागेको चलचित्रको अर्को भाग पनि निर्माण गरिने लेखक तथा निर्देशक गिरी बताउँछन् ।
‘यो हिन्दू धर्मग्रन्थका पात्रको आधुनिक अनुशरण हो,’ निर्देशकले भने । हिन्दू धर्मग्रन्थहरू रामायण, महाभारत र भागवत गीताका चरित्रलाई समेटेर चलचित्र बनाउन लागिएको निर्माण टिमको भनाइ छ । दर्शकलाई फरक स्वाद दिनेगरी चलचित्र निर्माण हुने टिमको दाबी छ ।
