०४ साउन २०८३, सोमबार
मोरङको प्रदेशसभा निर्वाचन क्षेत्र नम्बर ३(१) का लागि निर्वाचन आयोगले नयाँ चुनावी कार्यतालिका सार्वजनिक गरेको छ ।
कांग्रेसका उम्मेदवार शेखरचन्द्र थापाको निधन भएपछि निर्वाचन कार्यक्रम स्थगित गरिएको थियो । आयोगले सार्वजनिक गरेको निर्वाचन तालिकाअनुसार असोज २४ गते मनोनयनको समय तोकिएको छ ।
मनोनयन पत्र दर्ता भएको उम्मेदवारको सूचना प्रकाशन गर्ने, उम्मेदवारको विरोधमा उजुरी दिने समय समेत भोलि बिहीवारलाई नै तोकिएको छ ।
असोज २५ गते उम्मेदवारको नामावली प्रकाशन गर्ने, उम्मेदवारको नाम फिर्ता लिने, उम्मेदवारको अन्तिम नामावली प्रकाशन गर्ने, उम्मेदवारलाई निर्वाचन चिह्न प्रदान गर्ने कार्यतालिका आयोगले सार्वजनिक गरेको छ । सत्तारुढ गठबन्धनबाट नेपाली कांग्रेसका उम्मेदवार रहेका थापाको निधनपछि अब कांग्रेसले अर्काे उम्मेदवारी दर्ता गर्न आयोगले नयाँ निर्वाचन कार्यतालिका बनाएको छ ।
उम्मेदवारको निधन भएको पार्टीभन्दा अन्य दल तथा स्वतन्त्रले नयाँ तालिकाअनुसार मनोनयन दर्ता गर्न नपाउने प्रदेश निर्वाचन कार्यालयका प्रमुख लेवन काश्यप अधिकारीले बताए । उम्मेदवारको निधन भएपछि निर्वाचनका कार्यक्रम स्थगित गरीएको थियो ।
केही दिनअघि डेंगीबाट संक्रमित भएका मन्त्री थापालाई निमोनिया समेत भएको थियो । विराटनगरस्थित नोबेल अस्पतालमा उपचारका क्रममा बुधवार बिहान १०ः३० बजे निधन भएको थियो ।
