काठमाडौंका १० वटै निर्वाचन क्षेत्रमा सोमवार बिहानैदेखि मतगणना शुरू गर्ने तयारी गरिएको छ ।

काठमाडौंका मुख्य निर्वाचन अधिकृत राजुकुमार खतिवडाका अनुसार सर्वदलीय सहमतिका आधारमा बिहानदेखि मतगणना थालिनेछ । 

काठमाडौंको १ नम्बर निर्वाचन क्षेत्रको मतगणना बिहान ८ बजेदेखि शुरू गर्ने तयारी गरिएको उनले जानकारी दिए ।

काठमाडौंको १ नम्बर क्षेत्रको मतगणना अन्तर्राष्ट्रिय सम्मेलन केन्द्र नयाँ बानेश्वर, २ नम्बर क्षेत्रको कागेश्वरी मनोहरा नगरपालिकाको थलीस्थित राधाकृष्ण मन्दिर, ३ नम्बर क्षेत्रको गोकर्णेश्वर नगरपालिकाको जोरपाटीस्थित चामुण्डा मावि, ४ नम्बर क्षेत्रको बूढानीलकण्ठ नगरपालिकाको चपलीस्थित ज्येष्ठ नागरिक भवन र ५ नम्बर क्षेत्रको टोखा नगरपालिकाको श्रीसमाज भवनमा हुनेछ । 

६ नम्बर निर्वाचन क्षेत्रको तारकेश्वर नगरपालिकास्थित धर्मस्थली, ७ नम्बर क्षेत्रको बालाजुस्थित जुडो हल, ८ नम्बर क्षेत्रको स्वयम्भूस्थित गीतामाता विद्यालय, ९ नम्बर क्षेत्रको रविभवनस्थित न्याथम कलेज र काठमाडौंको १० नम्बर क्षेत्रको कीर्तिपुरस्थित त्रिवि स्मृति भवनमा मतगणना गरिनेछ । 
    
यद्यपि काठमाडौंको ७ नम्बर निर्वाचन क्षेत्रको मतगणना शुरू गरिसकिएको छ । निर्वाचन अधिकृत उषा श्रेष्ठले ४ स्थानमा मतगणना शुरू गरिएको जानकारी दिइन् । प्रतिनिधिसभा र प्रदेशसभाको प्रत्यक्ष तथा समानुपातिकको मतगणना एकसाथ अगाडि बढाइएको छ । 

ललितपुरको २ र ४ नम्बर निर्वाचन क्षेत्रको पनि मतगणना सोमवार बिहान २ बजदेखि शुरू भइसकेको छ । ललितपुरको २ नम्बर क्षेत्रको सातदोबाटोस्थित राष्ट्रिय खेदकुद परिषद् परिसर र ३ नम्बर क्षेत्रको जावलाखेलस्थित स्थानीय विकास प्रशिक्षण प्रतिष्ठानमा मतगणना जारी छ ।