आइतवारदेखि वाङ्मय शताब्दीपुरुष तथा संस्कृतविद् स्वर्गीय सत्यमोहन जोशीप्रति समर्पित ‘नेपालका देवताहरू’ नामक कला प्रदर्शनी हुने भएको छ । नेपाल कला परिषद्को ६०औँ वार्षिकोत्सव तथा नेपाल हस्तकला महासंघको स्वर्ण वर्षको अवसर पारेर कला प्रदर्शनी गर्न लागिएको हो । आगामी आइतवार (मंसिर ११)देखि २५ गतेसम्म राजधानीको बबरमहलस्थिल नेपाल कला परिषद्को भवनमा प्रदर्शनी आयोजना गरिएको छ । 

आइतवार दिउँसो १ बजे उपराष्ट्रपति नन्दबहादुर पुनले कला प्रदर्शनीको उद्घाटन गर्ने कार्यक्रम तय भएको परिषदका अध्यक्ष सागरशम्शेर राणाले बिहीवार आयोजित पत्रकार सम्मेलनमा जानकारी दिए । 

प्रलयपछिको श्रृष्टि कसरी भयो भन्ने जानकारी दिने मुख्य उद्धेश्यले प्रदर्शनी गर्न लागिएको उक्त पत्रकार सम्मेलनमा जानकारी दिइयो । प्रदर्शनीमा वरिष्ठ कलाकारदेखि नवोदित कलाकारहरूका कलाकृति राखिनेछ । खुला आह्वानका आधारमा ६ सय नेपाली कलाकारले पठाएको कलामध्ये २ सय ७० छनोट गरिएको र त्यसमा दुई सय ४६ कला प्रदर्शनीमा रहने प्रदर्शनी संयोजक स्वस्ती राजभण्डारीले जानकारी दिइन् । 

नेपालका देवीदेवताका चित्रकला, मूर्ति, हस्तकला प्रदर्शनीमा रहनेछन् । प्रदर्शनीले देवीदेवताहरूप्रति सहिष्णुता र अन्तरसम्बन्ध जगाउन, आगन्तुकहरूलाई विविधतामा विचार गर्न उत्प्रेरित गर्दै विभिन्न कलाकारहरूको अभिव्यक्ति र प्रेरणाको सद्भाव र समर्पणमा जोडिन प्ररित गर्ने आयोजकको विश्वास छ । ‘यो प्रदर्शनी वैचारिक रुपरेखा र छनौट प्रक्रियाको दृष्टिकोणमा अद्धितीय छ, जसले देशका विभिन्न समुदायका कलाकार र मूर्तिकारहरूबाट विभिन्न विधाका कलाकृतिहरू प्रदर्शन गर्दछ’ आयोजकले जारी गरेको प्रेस विज्ञप्तिमा भनिएको छ । 

कलाकृतिहरूको प्रदर्शनीले हिन्दू, बौद्ध धर्मको उत्पत्ति र आधारभूत सिद्धान्तहरूसँगै नेपालको मौलिक धर्म र दर्शनप्रति समेत जानकारी गराउने विश्वास आयोजकको छ । नेपाल कला परिषद तथा नेपाल हस्तकला महासंघले प्रदर्शनीमा सहभागी हुन सबैमा आग्रह गरेको छ ।