सत्तारुढ गठबन्धनबीच चुनावी तालमेल हुँदा नेकपा (एकिकृत समाजवादी) ले कर्णाली प्रदेशमा प्रतिनिधि सभा र प्रदेश सभा गरी पाँच सिट पाएको थियो । मंसिर ४ मा सम्पन्न आम निर्वाचनमा एकिकृत समाजवादीले प्रतिनिधि सभामा दैलेख–१, सल्यान र डोल्पा तथा प्रदेश सभामा जुम्ला–२ र मुगु–१ सिट पाएको थियो । प्रतिनिधि सभामा पाएका तीनवटै सिट जोगाउँदा एकिकृत समाजवादीले प्रदेश सभातर्फका दुवै सिट गुमाउन पुगेको छ । प्रतिनिधि सभामा सफलता पाए पनि प्रदेश सभामा एक सिट पनि जित्न सकेन । 

सल्यानमा एकिकृत समाजवादीका उपमहासचिव प्रकाश ज्वाला र डोल्पामा केन्द्रीय सदस्य धनबहादुर बुढा निकै फराकिलो मतान्तरले विजयी बने । दैलेख–१ मा प्रदेश कमिटी अध्यक्ष अम्मरबहादुर थापाले आफ्नै पूर्वसहकर्मी एमालेका रविन्द्रराज शर्मालाई ८४९ मतान्तरले पराजित गरे । ज्वालाको जिल्लामा त एमाले उम्मेदवारनिकट प्रतिष्पर्धामा आउन सकेनन ।

प्रदेश सभाका सिटमा तालमेल गर्दा एकिकृत समाजवादीले आफूलाई जित्न सहज भएको क्षेत्र रोजेको थियो । उसकै रोजाइअनुसार गठबन्धन दलको प्रदेशस्तरीय संयन्त्रले जुम्ला–२ र मुगु–१ एकिकृत समाजवादीको भागमा पार्न केन्द्रीय संयन्त्रलाई सिफारिस पनि गरेको थियो । तर, आफूले जित्न सहज ठानेका दुवै सिटमा समाजवादीका उम्मेदवार फराकिलो मतान्तरले पराजित हुनुपर्‍यो । 

एकिकृत समाजवादीले जुम्ला प्रदेश सभा क्षेत्र –२ मा प्रदेश सरकारका बहालवाला भौतिक पूर्वाधार तथा सहकारी विकासमन्त्री पदम रोकायालाई उम्मेदवार बनाएको थियो । त्यहाँ उनलाई १ हजार ९३ मतान्तरले पराजित गर्दै एमालेका युवा नेता टेकराज पछाईले निर्वाचित भए । पछाईले ७ हजार ८१५ मतले विजयी हुँदा रोकायाले ६ हजार ७२२ मत प्राप्त गरे । यस क्षेत्रमा २० हजार ६१६ मत खसेको थियो । २०७४ मा सोही क्षेत्रबाट प्रदेशसभा सदस्यमा निर्वाचित भएका रोकायाले एमाले विभाजनपछि एकिकृत समाजवादी रोजेका थिए । 

त्यस्तै, शनिवार बिहान सम्पन्न मुगु प्रदेश सभा क्षेत्र– १ को मतगणनामा एकिकृत समाजवादीका उम्मेदवार गोपालबहादुर बम पराजित भए । उनलाई एमालेका जीतबहादुर मल्लले १ हजार ७३ मतान्तरले पछि पारे । मल्ल एमालेका जिल्ला अध्यक्ष हुन भने बम एकिकृत समाजवादीका केन्द्रीय सदस्य र निवर्तमान प्रतिनिधि सभा सदस्य हुन् । उनी २०७४ मा मुगुबाट प्रतिनिधि सभामा निर्वाचित भएका थिए । एमाले विभाजन भएपछि उनले एकिकृत समाजवादी रोजेका थिए । 

सत्ता गठबन्धनको सहमतिविपरीत एकिकृत समाजवादीले सुर्खेत–२ को प्रदेश सभा–१ र २ मा पनि आफ्ना उम्मेदवार उठाएको थियो । प्रदेश–१ मा शिवप्रसाद उपाध्यायले १ हजार २७५ र प्रदेश–२ मा मोहनसिंह बडुवालले ६ हजार २०९ मत ल्याएका थिए । प्रदेश सभामा एमालेले प्रत्यक्षतर्फ पाँच सिट जित्दा एकिकृत समाजवादी भने शून्य भएको छ । कर्णाली प्रदेशमा समानुपातिकतर्फको मतगणना जारी छ ।