३१ जेठ २०८३, आइतबार
भारतका व्यापारी बाबा रामदेवले पुणेस्थित एक योग शिविरमा महिलाका विषयमा आपत्तिजनक बयान दिएका छन् ।
महिलाहरू सारी, सलवार र सुटमा राम्री देखिने अनि आफू जस्तै केही पनि लुगा नलगाउँदा पनि राम्रै देखिने रामदेवले बताए ।
रामदेवले यस्तो अश्लील टिप्पणी गरिरहँदा महाराष्ट्रका उपमुख्यमन्त्री देवेन्द्र फणनवीकी पत्नी अमृता पनि मञ्चमा सँगै थिइन् ।
रामदेवको यो टिप्पणीले सम्पूर्ण महिलालाई चोट पुगेको दिल्ली महिला आयोगकी अध्यक्षले प्रतिक्रिया दिइन् ।
उता उद्धव ठाकरे गुटका शिवसेना नेता सञ्जय राउतले रामदेवको टिप्पणीमाथि अमृताले किन विरोध नगरेको भनी प्रश्न उठाए ।
रामदेव आफ्ना बयानका कारण बारम्बार विवादमा आउने गरेका छन् । कोरोनाका विरुद्ध उनको पतञ्जलि कम्पनीले बनाएको औषधि सार्वजनिक गर्ने समारोहमा उनले मेडिकल डाक्टरहरूलाई हत्याराको संज्ञा दिएका थिए ।
