०२ साउन २०८३, शनिबार
चीनमा कोरोना संक्रमण फैलिन नदिनका लागि लगाइएको कठोर लकडाउनको घोर विरोध हुन थालेको छ ।
सिन्ज्याङ क्षेत्रमा रहेको एक अपार्टमेन्ट ब्लकमा आगो लागेपछि भागेका मानिसलाई पनि प्रहरीले फेरि भवनतर्फ नै जान भनेको खबर पनि आएको छ । आगलागीको घटनामा १० जनाको ज्यान गएको छ ।
घटना सार्वजनिक भएपछि धेरै ठाउँमा विरोध प्रदर्शन भइरहेको छ । विरोधकर्ताहरूको प्रदर्शनको भिडियो सामाजिक सञ्जालमा फैलिरहेको छ ।
सिन्ज्याङको राजधानी उरुमछीमा मानिसहरूले अधिकारीहरूका अगाडि रहेका ब्यारियर तोड्दै कोरोना लकडाउन अन्त्य गर्नुपर्छ भन्दै नारा लगाए । चीन सरकारको जिरो कोभिड नीतिका कारण कठोर लकडाउन छ । तर संक्रमण घटेको छैन ।
विरोध प्रदर्शनपछि उरुमछीका अधिकारीहरूले चरणबद्ध रूपमा लकडाउन अन्त्य गर्ने वाचा गरेका छन् । तर आगलागी भएको भवनबाट मानिसहरूलाई बाहिर निस्कन नदिएको खबरलाई उनीहरूले खारेज गरेका छन् ।
बीबीसीको खबरमा उल्लेख गरिएअनुसार, आगो लागेको भवनमा धेरैजनालाई बाहिर निस्कन दिइएको थिएन । तर चीनका आधिकारिक सञ्चारमाध्यमहरूले यस खबरलाई खारेज गरेका छन् ।
शुक्रवार राति भएका विरोध प्रदर्शनका भिडियोहरू चीनको सामाजिक सञ्जालबाट हटाइसकिएको छ ।
कोरोना प्रतिबन्धका कारण फायर ब्रिगेड पनि समयमा पुग्न नसकेको बताइएको छ ।
