१० असार २०८३, बुधबार
रुसको ब्रिआन्स्क क्षेत्रमा रहेको एक तेल डिपोमा बुधवार बिहान युक्रेनले ड्रोन आक्रमण गरेपछि त्यसमा भयानक आगलागी भएको छ ।
स्थानीय समयअनुसार बिहान ६ बजे हजारौं टन डिजेल भएका तीनवटा ट्यांकमा आगो लागेको थियो ।
रुसी सञ्चारमाध्यमका अनुसार, एउटा ड्रोनले इनधन राखेको ट्यांकमा विस्फोटक पदार्थ फ्याँकेको थियो ।
घटनामा कोही हताहत नभएको बताइएको छ ।
घटना भएलगत्तै खिचिएको भिडियोमा दुईवटा ट्यांकबाट आगो र धूवाँको मुश्लो निस्किएको देखिन्छ । विस्फोटका कारण ट्यांक भित्रपट्टि कुच्चिएको समेत पाइन्छ ।
युक्रेनले घटनाको जिम्मेवारी नलिएको भए पनि रुसको पश्चिमी सीमामा रहेका सैनिकलाई सामग्री आपूर्ति गर्ने स्थानमा उसैले आक्रमण गरेको विश्वास गरिएको छ ।
उत्तरी युक्रेनसँग जोडिने रुसका तीन क्षेत्र ब्रिआन्स्क, कुर्स्क र बेल्गोरोदमा युक्रेनले लगातार आक्रमण गर्ने गरेको छ ।
