२९ असार २०८३, सोमबार
नेकपा (एमाले) का केन्द्रीय सदस्य तथा पूर्व रक्षामन्त्री भीमबहादुर रावलले छिमेकी मुलुक भारतले महाकाली नदीको धार परिवर्तन हुनेगरी तटबन्ध बनाउँदा पनि सरकार मौन बस्नु लज्जाजनक भएको बताएका छन् । नेता रावलले हिजो राति सामाजिक सञ्जालमा ट्वीट गर्दै सो कुरा बताएका हुन् ।
दुई देशका नागरिकबीच ढुंगा हानाहान हुँदा पनि प्रधानमन्त्री शेरबहादुर देउवा र सरकार चुइक्क नबोल्नु लज्जाजनक हो उनले भने, “दुई देशबीचको यति गम्भीर विषय प्रमुख जिल्ला अधिकारीले हेरेर हुने होइन, प्रम र मन्त्रालय देशप्रति जिम्मेवाउ होऊ ।”
सुदूरपश्चिमको दार्चुलाको खलंगास्थित भारतले महाकाली नदीको बीचमा तटबन्ध बनाएर धार परिवर्तन गर्दा केही दिनदेखि नेपाल र भारतका नागरिकबीच ढुंगा हानाहान हुँदैआएको छ । नेपाली नागरिकले नदीको धार परिवर्तन गर्दा नेपालको भूमि मासिने भन्दै त्यसलाई रोक्न भारत सरकारसँग माग गर्दैआएका छन् ।
दुई देशका नागरिकबीच तनाव भएपछि स्थानीय भारत र नेपाल प्रशासनबीच छलफल भएर संवाद मार्फत समस्या समाधान गर्ने छलफल भएको छ । दुई देशका नागरिकबीचको ढुंगा हानाहानले केही नागरिक घाइतेभएको प्रशासनले जनाएको छ ।
