०४ असार २०८३, बिहीबार
काभ्रेको दक्षिणी क्षेत्र डाँडापारिस्थित महाभारत गाउँपालिकाको रेबिज रोगका कारण पशुचौपाया मरेपछि स्थानीयलाई रेबिजविरुद्ध खोप दिन थालिएको छ ।
कुकुरको टोकाइले रेबिज संक्रमणका कारण केही दिनअघि २ गाउँमा २ गाई मरेका थिए ।
महाभारत–१ को गोकुले र ८ नम्बर वडास्थित घर्तीछापका स्थानीयलाई रेबिज विरुद्धको खोप दिन थालिएको जनाइएको छ । सोमवार साँझसम्म १९ स्थानीयलाई खोप लगाइएको जिल्ला स्वास्थ्य कार्यालय प्रमुख डा. पुरुषोत्तम सेढाईंले जानकारी दिए ।
उनका अनुसार रेबिज प्रभावित क्षेत्रमा १६० डोज खोप उपलब्ध गराइएको छ ।
उनका अनुसार मरेका २ गाईका केही अंगहरू गाडिएको स्थानबाट निकालेर परीक्षण गर्दा शनिवार रेबिज रोगबाट गाई मरेको पुष्टि भएको हो । ‘हामी रोकथामका लागि थप अनुसन्धान गरिरहेका छौं, स्थानीय स्वास्थ्यकर्मीमार्फत खोप लगाउन स्थानीयलाई पे्ररित गरिरहेका छौं,’ सेढाईंले भने । स्थानीयका अनुसार मासु खाएका कारण २ गाउँका करीब ६० जना ‘ट्रेसिङ’मा परेको बताइन्छ ।
सोमवारदेखि स्थानीय जनप्रतिनिधि, अगुवालगायत विद्यार्थीले चेतनामूलक र्यालीको आयोजना गरेका छन् । गाउँपालिकामा देखिएको रेबिज रोगप्रति जिल्ला स्वास्थ्य कार्यालय र जिल्लास्थित भेटेरेनरी अस्पताल तथा पशु सेवा विज्ञ केन्द्रले आवश्यक अनुसन्धान तथा पशुचौपायालाई सुरक्षित गर्नेबारे समन्वय भइरहेको जनाएका छन् । काभ्रेपलाञ्चोकमा ३ महिनापछि महाभारतमा रेबिज रोग फेलापरेको हो ।
यसअघि गत भदौमा भुम्लु गाउँपालिकामा रेबिज रोगका कारण १ महिनाको अवधिमा ४ दर्जनभन्दा बढी पशुचौपायाको मृत्यु भएको थियो । कार्यालयले त्यतिबेला २८९ जनालाई रेबिजविरुद्ध खोप लगाएको थियो । स्थानीय १९ परिवारका ५१ जनाले कुकुरले टोकेर मरेका भैंसी तथा खसी, बोका काटेर मासु खाएपछि तथा अन्य शंकास्पद व्यक्तिलाई खोप लगाउनुपरेको सेढाईंले बताए ।
