१० साउन २०८३, आइतबार
प्रधानमन्त्री एवं नेपाली कांग्रेसका सभापति शेरबहादुर देउवाले संसदीय दलको नेतामा उठ्ने तयारी थालेका छन् । संसदीय दलको नेता बन्न चाहेका देउवाले नेताहरूसँग सहयोगका लागि आग्रह गरेका छन् ।
पूर्वमहामन्त्री डा. शशांक कोइरालासँग मंगलवार बिहान भएको भेटमा देउवाले संसदीय दलको नेतामा आफूलाई समर्थन गर्न प्रस्ताव गरेका हुन् । पूर्वी नवलपरासीबाट लगातार चौँथो पटक चुनाव जितेका कोइराला देउवासँग बधाइ साट्न बिहान बालुवाटार पुगेका थिए ।
कोइरालाका सहयोगी भरत तिवारीले देउवाले संसदीय दलको नेतामा सहयोग गर्न आग्रह गरेको जानकारी दिए । ‘सभापतिज्यूले संसदीय दलको नेतामा उठ्ने तयारी गरेको र समर्थन गर्न आग्रह गर्नुभयो । शशांक दाइले बधाइ दिन मात्र आएको हो भन्नुभयो’, तिवारीले लोकान्तरसँग भने ।
विगतमा देउवा इतरको प्यानलबाट चुनाव लडेर महामन्त्री भएका शशांक कतै खुलेका छैनन् । देउवालाई भेटेलगत्तै कांग्रेस वरिष्ठ नेता रामचन्द्र पौडेलले शशांकलाई भेटेका थिए ।
शशांकलाई भेट्न पौडेल कोइराला निवासमा पुगेका थिए । संसदीय दलको नेताका लागि पौडेलले पनि दौडधूप गरिरहेका छन् । ‘रामचन्द्र दाइसँग पनि भेट भएको हो, आजै शेखर दाइसँग पनि भेट्ने कुरा थियो । शेखर दाइ विराटनगर जानु परेकोले आज सम्भव भएन । सबै भेटमा बधाइ साटासाट मात्र भएको छ’, तिवारीले भने ।
नेपाली कांग्रेसभित्र देउवाका अतिरिक्त महामन्त्री गगन थापा, रामचन्द्र पौडेललगायतले संसदीय दलको नेताका लागि आकांक्षा देखाएका छन् । नयाँ सरकारको नेतृत्व दाबी गरेको कांग्रेसमा संसदीय दलको नेता बन्न कसरत शुरु भएको छ ।
