सशस्त्र द्वन्द्वका बेला बन्द भएको परमानन्द संस्कृत गुरुकूल पाठशाला पुनः सञ्चालनको उद्देश्य राखेर बागलुङको ‘बिहुँकोट धार्मिक महोत्सव २०७९’ शुरू गरिएको छ ।

काठेखोला गाउँपालिका–५ रामकोटधाममा आयोजित महोत्सवको बिहीवार गलेश्वर आश्रम देवघाटधामका पीठाधीश महामण्डलेश्वर श्री १००८ स्वामी आत्मानन्द गिरी महाराजले शुभारम्भ गरे ।

रामकोटधामका संस्थापक दिवंगत स्वामी श्री १००८ परमानन्द सरस्वती महाराजले विक्रम संवत् २०३१ मा स्थापना गरेको गुरुकूल विक्रम संवत् २०५६ मा बन्द भएको थियो ।

गुरुकूल नचलेपछि यहाँका विद्यार्थीलाई देवघाटधाममा रहेको गुरुकूल विद्यापीठमा लगिएको थियो । पुनः रामकोटधामबाटै संस्कृत गुरुकूल चलाउने ध्येयले धार्मिक महोत्सव आयोजना गरिएको महोत्सवको प्रमुख संकल्पकर्ता बिहुँकोट अन्तर्राष्ट्रिय समाजका अध्यक्ष देवीलाल सुवेदीले बताए ।

मंसिर २८ गतेसम्म चल्ने महोत्सवमा देशभरबाट सन्त, महात्माहरूको उपस्थिति रहने जनाइएको छ । झाँकी प्रदर्शनी, हेलिकप्टरबाट पुष्ट वृष्टि, धार्मिकस्थलको दृश्यावलोकन, धार्मिक प्रवचन, वैदिक पूजाअर्चना, भजन संकीर्तन, पञ्चेबाजा प्रतियोगिता लगायत सांस्कृतिक कार्यक्रम आयोजना गरिएको छ ।

महोत्सवबाट संकलित रकम संस्कृत गुरुकूल सञ्चालनमा खर्च गरिनेछ । ‘महोत्सव शुरू हुनुभन्दा अगावै ६५ लाख जति जुटिसकेको छ, त्यति नै रकम सहयोगको प्रतिबद्धता आएको छ,’ उनले भने ।