युक्रेनमाथि रुसको आक्रमणपछि युरोपमा ऊर्जा संकट चर्किएसँगै जर्मनीमा मैनबत्तीको माग बढेको छ । 

युरोपेली मैनबत्ती उत्पादक संघका प्राविधिक निर्देशक स्टेफान थोमानले अहिले मैनबत्तीको व्यापक माग रहेको बताए । 

रुसी आक्रमणअघि जर्मनीले रुसबाट आधाभन्दा बढी प्राकृतिक ग्यास लिइरहेको थियो । युरोपेली संघमा जर्मनी नै रुसी ग्यासको सबभन्दा ठूलो ग्राहक थियो । त्यस ग्यासमार्फत जर्मनहरू घर तताउने, विद्युत् उत्पादन गर्ने र कारखाना चलाउने गर्थे । 

युद्ध शुरू भएपछि जर्मनीले रुसी प्राकृतिक ग्यासको आयात घटायो । तर रुसी ग्यासमा जर्मन अर्थतन्त्र निर्भर रहेकाले राजनीतिकर्मीहरू त्यसको पूरै कटौतीको विपक्षमा थिए । 

तर बाल्टिक सागरमा राखिएको पाइपलाइन मर्मत गर्नुपर्ने भएको भन्दै रुसले जर्मनीलाई दिँदै आएको ग्यासको प्रवाह घटायो । अनि सेप्टेम्बर महिनामा त्यही पाइपलाइनका केही भागमा बम विस्फोट गरिएपछि रुसले अहिले ग्यास प्रवाह पूरै रोकेको छ । 

जर्मनी अहिले आफ्नो ऊर्जा अर्थतन्त्रलाई परिवर्तन गराउने पक्षमा छ । ऊ ग्यास उपभोग घटाउन चाहन्छ । 

तर ऊर्जाको मूल्य उच्च बनेको अनि अभाव र लोडशेडिङको सम्भावना बढेकाले जर्मनहरू चिन्तित छन् । 

उनीहरू अहिले विशाल संख्यामा मैनबत्ती किनिरहेका छन् । 

मैनबत्ती बाहेक हीटरहरूको माग पनि बढेको छ । तर बिजुली कम्पनीहरूले हीटरको अत्यधिक प्रयोग नगर्न चेतावनी दिएका छन् । विद्युतीय ग्रिडमा बढी भार पर्ने भएकाले उक्त चेतावनी दिइएको हो ।