सरकार गठनका विषयमा छलफल गर्न प्रधानमन्त्रीको सरकारी निवास बालुवाटार पुगेका नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बाहिरिएका छन् । प्रधानमन्त्री शेरबहादुर देउवासहित सत्ता गठबन्धन दलका शीर्ष नेताहरूसँग छलफलका लागि बालुवाटार पुगेका उनी छलफलबाट बाहिरिएका हुन् । 

प्रधानमन्त्री देउवाले अहिले नेकपा एकीकृत समाजवादीका अध्यक्ष माधवकुमार नेपाल र सम्मानित नेता झलनाथ खनालसँग वार्ता गरिरहेका छन् ।

गठबन्धन दलका शीर्ष नेताहरूसँग दुई घण्टा छलफल गरेपछि उनी बाहिरिएका छन् । सरकार गठनका विषयमा सत्तारुढ दलहरूबीच अझै पनि सहमति भइसकेको छैन । 

राष्ट्रपति विद्यादेवी भण्डारीले सरकारको नेतृत्वमा दाबी पेश गर्न आज साँझ ५ बजेसम्मको समयसीमा दिएकी छन् । समयसीमाभित्रै सहमति गरेर सरकारको नेतृत्वमा दाबी गर्न सत्ता गठबन्धनका दलहरूबीच छलफल तीव्र छ । 

गठबन्धन दलका अन्य नेताहरूसँग छलफल अघि प्रधानमन्त्री देउवा र प्रचण्डले ‘वान टु वान’ वार्ता पनि गरेका थिए ।