निजी क्षेत्रको छाता संस्था नेपाल उद्योग परिसंघ (सीएनआई)ले नवनियुक्त उपप्रधानमन्त्री तथा अर्थमन्त्री विष्णुप्रसाद पौडेलसँग भेटवार्ता गरेको छ । नेपाल उद्योग परिसंघका अध्यक्ष विष्णुकुमार अग्रवाल नेतृत्वको परिसंघ टोलीले मंगलवार अर्थमन्त्रीलाई भेटेर अर्थतन्त्रलाई पुनर्जिवित गराउन आग्रह गरेका छन् । 

परिसंघका अध्यक्ष अग्रवालले मागमा आएको उच्च संकुचन, उच्च ब्याजदर, लगानीयोग्य पूँजीको अभावजस्ता कारणले उद्योगी व्यवसायीको मनोबल निकै खस्किएको बताए । उद्योगी व्यवसायीको घट्दो मनोबल बढाउन र चुनौतीपूर्ण अवस्थामा रहेको अर्थतन्त्रलाई पुनर्जिवित गर्ने नीति अबलम्बन गर्न आग्रह गरे । 

उद्योगी व्यवसायीको घटेको मनोबल उकास्न तत्काल २ प्रतिशतसम्म प्रतिमहिना ब्याजदर घटाउन आग्रह गरेका छन् । उनीहरुले चालु पुँजी कर्जा निर्देशिका पुराना ग्राहकहरूका लागि २ वर्षसम्म स्थगित गर्नसके तत्काल सकारात्मक सन्देश सञ्चार गरेर व्यवसायीलाई उत्साहित गराउन सकिने पनि बताए । 

आयात प्रतिस्थापन गर्ने उद्योगहरूलाई प्रोत्साहन गर्न, कार्यान्वयनमा नआएका ६ वटा औद्योगिक क्षेत्रलाई सार्वजनिक–निजी साझेदारीमा सक्दो छिटो कार्यान्वयनमा लैजान पनि परिसंघले आग्रह गरेको छ ।