जिल्ला फूटबल संघ खोटाङले केपिलासगढी गाउँपालिका–४ बाक्सिला बजारका आगलागी पीडितको सहयोगार्थ राहत संकलन अभियान शुरू गरेको छ । 

पुस ४ गते साँझ बाक्सिला बजारमा भएको आगलागीमा फूटबल संघका जिल्ला उपाध्यक्ष समिर राई र बाक्सिला फूटबल क्लब बाक्सिलाका सचिव पवन श्रेष्ठ समेत पीडित भएपछि जिल्ला फूटबल संघले राहत संकलन अभियान शुरू गरेको हो । 

बाक्सिला बजारका दीपक गुरुङको घरमा विद्युत् सर्ट हुँदा शुरू भएको आगोले डिल्लीकुमार श्रेष्ठ, शुभराज राई, रमेश परियार र अकबर राईको घर जलेर नष्ट भएको थियो । सो आगलागीमा फूटबल संघका उपाध्यक्ष एवं गाउँपालिका प्रमुख राईको १ करोड २५ लाख र बाक्सिला फूटबल क्लबका सचिव श्रेष्ठको २० लाख ४० हजार रुपैयाँ बराबरको क्षति भएको प्रहरीले जनाएको छ । 

अभियानअन्तर्गत हालसम्म १४ दाताबाट १ लाख ४२ हजार २०० राहत संकलन भइसकेको फूटबल संघका अध्यक्ष ध्रुवविक्रम राईले जानकारी दिए । आगलागी पीडितका लागि दिक्तेल रुपाकोट मझुवागढी नगरपालिका–२ सोल्माका युवा समाजसेवी हटमिलन राईले १ लाख १ हजार १ रुपैयाँ सहयोग गरेका छन् ।

फूटबल संघका अध्यक्ष राईले १० हजार १, सुमन पुमाले ५ हजार, कमल चाम्लिङले ५ हजार, काजीमान राईले ५ हजार, प्रकाश राई ‘पिके’ले ३ हजार, विनोद तिरुवाले ३ हजार, हिरन राईले २ हजार, सनम राई ‘जोजो’ले २ हजार, रोशेस श्रेष्ठले २ हजार, अमर श्रेष्ठले १ हजार १००, मनोज थापले १ हजार १००, गंगाबहादुर विश्वकर्माले १ हजार र पर्शुराम विश्वकर्माले १ हजार सहयोग गरेका छन् । संकलित रकम केही समयपछि अग्नि पीडितलाई हस्तान्तरण गर्ने अध्यक्ष राईले बताए ।