मेलम्चीको पानी वितरणका लागि काठमाडौं उपत्यका खानेपानी लिमिटेड (केयूकेएल) आयोजना कार्यान्वयन निर्देशनालयले दोस्रो चरणमा ७९६ किलोमिटर वितरण सञ्जाल निर्माण गरिरहेको छ । 

बालुवाटार, स्वयम्भू, मण्डिखाटार र कपन क्षेत्रमा निर्माण भइरहेको ७९६ किलोमिटर वितरण सञ्जालमध्ये ४२७ किलोमिटरको काम सकिएको निर्देशनालयका प्रवक्ता चन्द्रकुमार श्रेष्ठले जानकारी दिए । बाँकी काम पनि चालू आर्थिक वर्षको अन्त्यसम्म सकिने उनको भनाइ छ । 

वितरण सञ्जालमा ४ वटा निर्माण कम्पनीले काम गरिरहेका छन् । स्वयम्भू क्षेत्रमा शर्मा/रमा जेभी, बालुवाटार क्षेत्रमा धुम्/टिम्स्/कुमार/सीएभी/क्याब जेभीले काम गरिरहेको निर्देशनालयले जनाएको छ । 

मण्डिखाटार क्षेत्रमा वितरण सञ्जाल निर्माणमा टुँडी कन्स्ट्रक्सनले काम गरिरहेको छ । कपन क्षेत्रमा भने लिपेल/सैलुङ जेभीले काम गरिरहेको छ । कूल ७ अर्ब ३६ करोड ३ लाख ८४ हजार लागतमा दोस्रो चरणको ७९६ किलोमिटर वितरण सञ्जालको काम भइरहेको हो । 

निर्देशनालयले पहिलो चरणमा १ हजार १० किमी वितरण सञ्जाल निर्माण गरिसकेको छ । त्यसमध्ये ५३२ किमी वितरण सञ्जालमा मेलम्चीको पानी परीक्षण भइसकेको छ । पहिलो चरणमा निर्माण भएको बाँकी क्षेत्रमा पनि पानी परीक्षणको काम भइरहेको छ ।