१२ साउन २०८३, मंगलबार
काठमाडौंमा जारी नेपाल टी– २० क्रिकेट प्रतियोगितामा खेल मिलेमतोको प्रयास भएको विषयमा नेपाली राष्ट्रिय टोलीका पूर्वकप्तान ज्ञानेन्द्र मल्लले गम्भीर खुलासा गरेका छन् ।
कीर्तिपुर मैदानमा मंगलवार खेलपछिको 'पोस्ट म्याच कन्फ्रेन्स'मा काठमाडौं नाइट्सका कप्तान समेत रहेका मल्लले आफ्नो टीमका एक खेलाडीलाई 'स्पट फिक्सिङ'का लागि प्रस्ताव आएको खुलासा गरेका हुन् ।
उनले ती खेलाडीको नाम भने खुलाएनन् ।
सोही क्रममा विराटनगर सुपरकिंग्स तथा राष्ट्रिय क्रिकेट टीमका कप्तान रोहित पौडेलले पनि 'स्पट फिक्सिङ' भएको भए छानबिन गरेर कारबाही हुनुपर्ने बताए ।
शुरूदेखि नै विवादमा पर्दै आएको यो प्रतियोगितामा 'स्पट फिक्सिङ' भएको आरोप जोडतोडले लागेको छ ।
एक कमेन्टेटर फिक्सिङको आरोपसहित प्रतियोगिताबाट अलग भएका छन् ।
आजको खेलमा खेलाडीले पारिश्रमिक नपाएको भन्दै दुवै टीमका कप्तानले शुरूमा टस गर्न नै अस्वीकार गरेका थिए ।
पछि आज रातिसम्ममा पारिश्रमिक उपलब्ध गराउने सहमति भएर खेल सञ्चालन भएको थियो ।
उक्त खेलमा काठमाडौं नाइट्सले विराटनगर सुपरकिंग्सलाई २४ रनले पराजित गर्यो ।
फोटो : विश्वास खनाल/लोकान्तर
