२८ असार २०८३, आइतबार
चितवन जिल्लाको इच्छाकामना गाउँपालिका–४ स्थित मनकामना केबलकारमा रोप रेस्क्यु सम्बन्धी अभ्यास गरिएको छ ।
सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटार र मनकामना केबलकार प्राइभेट लिमिटेडको सहकार्यमा रोप रेस्क्यु सम्बन्धी अभ्यास गरिएको हो ।
मनकामना केबलकारमा दर्शनार्थी चढेको समयमा कुनै कारणवश केवलकार रोकियो भने छिटो र सजिलो तरिका अपनाई उनीहरूको उद्वार कसरी गर्न सकिन्छ भन्ने उद्देश्यले अभ्यास गरिएको हो ।
घिर्नीको सहयोगमा डोरीको माध्यमबाट केबलकारमा अड्किएकाहरूलाई सजिलैसँग उद्वार गर्न सकिने तरिका अभ्यासमा देखाइएको थियो । भविष्यमा आइपर्न सक्ने समस्यालाई सजिलैसँग समाधान गर्न सकियोस् भन्ने उद्देश्यले गरिएको रोप रेस्क्यु अभ्यासमा शिक्षालयमा कार्यरत विपद् व्यवस्थापन सम्बन्धी दक्ष सशस्त्र प्रहरी कर्मचारीको सहभागिता थियो ।
यसअघि शिक्षालयले आगलागी नियन्त्रण, विपद् प्रकोप, दुर्घटना, भूकम्पमा परेकाहरूको खोज तथा उद्वार, उनीहरूलाई दिइने प्राथमिक उपचार र सहयोगजस्ता विषयलाई लक्षित गरी अभ्यास समेत गर्दै आइरहेको सहायक प्रवक्ता सशस्त्र प्रहरी नायब उपरीक्षक शैलेन्द्र थापाले जानकारी दिए ।
