चितवन महोत्सवको सांस्कृतिक कार्यक्रम अन्तर्गत सञ्चालन भएको राष्ट्रिय दोहोरी गीत प्रतियोगितामा राष्ट्रिय लोक तथा दोहोरी गीत प्रतिष्ठान रुपन्देही पहिलो भएको छ । पहिलो भएको रुपन्देहीले ८० हजार रुपैयाँ पुरस्कार प्राप्त गरेको महोत्सवका सांस्कृतिक संयोजक नारायण प्रधानले जानकारी दिए । प्रतियोगितामा राष्ट्रिय लोक तथा दोहोरी गीत प्रतिष्ठान गोरखा दोस्रो भएको छ । 

संयोजक प्रधानकाअनुसार दोस्रो भएको गोरखाले ६० हजार रुपैयाँ पुरस्कार पाएको छ । पुस २८ गतेदेखि शुरु भएको राष्ट्रिय लोक तथा दोहोरी गीत प्रतियोगितामा विभिन्न आठ जिल्लाका कलाकारको सहभागिता थियो । प्रतियोगितामा पहिलो र दोस्रो हुने कलाकारलाई पुरस्कार वितरण गरिएको प्रधानले जानकारी दिए । 

महोत्सवको सांस्कृतिक कार्यक्रम अन्तर्गत हास्य प्रहसन तथा नृत्य प्रस्तुत भएको प्रधानको भनाइ छ । प्रधानकाअनुसार हास्य कलाकारहरु राजु मास्टर, बल्छी ध्रुवे, मास्टरनी, रजनी गुरुङ (मङ्गली) लगायतका कलाकारले प्रस्तुति गरेका थिए । त्यस्तै, विभिन्न संघ संस्थाले जातजातिको मौलिक नृत्यसँगै आधुनिक गीत तथा नृत्य प्रस्तुत गरेको प्रधानले बताए ।