अनुमतिविना नक्सा परिवर्तन गर्ने तत्कालीन नापी अधिकृतविरुद्ध आरोपपत्र दायर

अख्तियार दुरुपयोग अनुसन्धान आयोगले नापी कार्यालय रुपन्देहीका तत्कालीन नापी अधिकृत घनश्याम दुवे र सर्भेक्षक ठाकुर प्रसाद गुरौविरुद्ध भ्रष्टाचार गरेको ठहर गर्दै विशेष अदालतमा आरोप-पत्र दायर गरेको छ।  

उनीहरूले रुपन्देही जिल्लाको साविक सेमलार गाविस वडा नम्बर २ मा ११ धुर जग्गा जग्गाधनीको अनुमतिविना ३ धुर जग्गा उक्त कित्ताबाट हटाएर नक्सा परिवर्तन गरेको अख्तियारको ठहर छ।  

अख्तियारले उजुरीका आधारमा सरकारी निकायको कागजातमा अनाधिकार वा गैरकानूनी तरिकाले सच्याउने वा हेरफेर गर्ने कार्य गरेको भन्दै दुवे र गुरौलाई भ्रष्टाचार निवारण ऐनको दफा ११ बमोजिम कैद र जरिवाना माग गरेको छ।

साथै बुटवल उपमहानगरपालिका वडा नम्बर १३ बस्ने शक्तिप्रसाद सापकोटा र पुष्पा सापकोटाले आफूहरूले फाइदा लिने उद्देश्यले जग्गाको क्षेत्रफल घटाई नक्सा परिवर्तन गर्ने कार्यमा सहयोग गरेको भन्दै अख्तियारले उनीहरूलाई पनि ऐनको दफा ११ बमोजिम कसूरदार ठहर गर्दै आरोपपत्र दायर गरेको छ।