दिगो विकास सुशासन समितिका सभापति प्रकाश पन्थले किसानको हातमा सहजरुपमा मल पु¥याउनका लागि कार्ययोजना बनाइ कार्यान्वयन निर्देशन दिएका छन् ।

दिगो विकास सुशासन समितिले आयोजना गरेको ‘किसानलाई कृषि मल एवं बीउबिजन समयमा उपलब्ध गराउने सुनिश्चिता’ विषयक छलफलमा बोल्दै कृषि तथा पशुपन्छी विकास मन्त्रालयका सचिव डा गोविन्दप्रसाद शर्माले रासायनिक मल आपूर्तिका लागि सबै निकायको समन्वय र सहयोगमा मन्त्रालयले तत्कालीन र दीर्घकालीन कार्ययोजना बनाएर कार्यान्वयन गर्ने प्रतिबद्धता व्यक्त गरे ।

उनले आगामी जेठदेखि असारसम्म थप ९० हजार मेट्रिक टन मल आवश्यक पर्ने भन्दै यसका लागि रू सात अर्ब ७३ करोड आवश्यक भएको बताए । 

आर्थिक वर्ष २०७८/७९ मा एक लाख ७७ हजार पाँच सय छ आपूर्ति भएकोमा चालु आवमा हालसम्म तीन लाख २४ हजार मेट्रिक टन मल खरिदका लागि बोलपत्र आह्वान भएको थियो । जसमध्ये एक लाख ३८ हजार एक सय मेट्रिक टन भित्रिएको र एक लाख ३६ हजार छ सय मेट्रिकटन बिक्री वितरण भइसकेको सचिव शर्माले जानकारी दिए । 

कार्यक्रममा उत्पादकत्व वृद्धि, गुणस्तरीय बिउ प्रदान, उत्पादित वस्तु बजारीकरणको समस्य समाधान, उत्पादनको अनुपात, आवश्यकताका आधारमा मल वितरण, अनुगमन सुदृढ बनाउन तथा दीगो व्यवस्थापनका लागि मल कारखाना खोल्नुपर्ने विषयमा छलफल भएको थियो ।