काठमाडौं, ४ भदौ— निर्वाचन आयोगले राप्रपा विभाजन गरी नयाँ दल राप्रपा प्रजातान्त्रिक गठनको पहल थालेका पशुशपति शमशेर राणालाई केन्द्रीय सदस्य तथा सांसदको सनाखत गराउन आइतबारको लागि बोलाएपनि कोहि पनि आयोग पुगेनन् ।
आयोगका शाखा अधिकृत सन्तोषप्रसाद भण्डारीले एक विज्ञप्ति जारी गर्दै तोकिएको समय बिहान ११ बजेदेखि बेलुका ५ बजेसम्ममा कोहि पनि आयोगमा उपस्थित नभएको जनाएका छन् ।
यसअघि आयोगले राणालाई दल दर्ताको लागि उपस्थित हुन भन्दै गत असार २३ गते गोरखापत्र दैनिकमै सुचना निकालेको थियो । त्यसको एक दिन अघि पनि आयोगले राणालाई सनाखतका लागि बोलाएको थियो । तर पत्र ढिला गरी पाएको भन्दै राणाले १० दिन समय थप गर्न माग गर्दै निर्वाचन आयोगमा निवेदन दिएका थिए र आजको लागि बोलाइएको थियो ।
यसअघि नै सांसद र केन्द्रीय सदस्यको नाम सनाखत आयोगमा गराइसकेकाले पुनः गराइन नपर्ने माग गर्दै राणाले शुक्रबार सर्वोच्चमा मुद्दा दायर गरेका थिए । सो मुद्दाको किनारा लागेपछि मात्रै आफूहरु अघि बढ्ने राणा समूहको भनाई छ । आज मुद्दाको पेशी भएपनि हेर्दाहेर्दैमा राखिएको छ ।
दल सम्बन्धी ऐन, २०७३ को दफा ३३ को उपदफा (२) बमोजिम राष्ट्रिय प्रजातन्त्र पार्टी (प्रजातान्त्रिक) नामको दल दर्ताको मान्यता पाउन राणाले केन्द्रीय सदस्य र सांसदको ४० प्रतिशत पुर्याउनु पर्ने हुन्छ ।
यसैबीच संस्थापनले राणाले तोकिएको मितिमा ४० प्रतिशत देखाउन नसकेकोले अब प्रक्रिया स्वत खारेज हुने दाबी गरेको छ। यसविषयमा आयोगले भने अब के हुन्छ भन्नेमा स्पष्ट धारणा सार्वजनिक गरिसकेको छैन ।
