नेपाल दूरसञ्चार प्राधिकरणले युनाइटेड टेलिकमलाई (यूटीएल) बक्यौता बापतको रकम भुक्तानी गर्न निर्देशन दिएको छ ।

प्राधिकरणले सोमवार एक सूचना जारी गर्दै आगामी माघ मसान्तसम्म बाँकी बक्यौता रकम भुक्तानी गर्न यूटीएललाई निर्देशन दिएको हो ।

यूटीएलले प्राधिकरणलाई ५ अर्ब ३० करोड ९४ लाख ४९ हजार १५३ भुक्तानी गर्न बाँकी छ । कम्पनीलाई विक्रम संवत् २०७३ भदौ २० गते आधारभूत टेलिफोन सेवाको अनुमतिपत्र प्रदान गरिएको थियो । त्यसपछि प्राधिकरणलाई तिर्नुपर्ने अनुमतिपत्र नवीकरण दस्तुर बापतको किस्ता रकम, फ्रिक्वेन्सी, रोयल्टी र ग्रामीण दूरसञ्चार विकास कोष लगायत दस्तुर रकम भुक्तानी गरेको छैन । 

लामो समयसम्म तोकिएको रकम भुक्तानी नगरेपछि प्राधिकरणले माघ मसान्तसम्मको समय तोकेर भुक्तानी गर्न निर्देशन गरेको हो । माघ मसान्तभित्र बक्यौता रकम नतिरेमा प्रचलित कानून बमोजिम कारबाही अघि बढाउने प्राधिकरणले चेतावनी दिएको छ ।

नेपाल दूरसञ्चार प्राधिकरणले केसीएन नेट प्रालिको लाइसेन्स खारेज गरेको छ । प्राधिकरणले सोमवार एक सूचना जारी गर्दै केसीएन नेट प्रालि काठमाडौं महानगरपालिका–६ बौद्धलाई दिइएको लाइसेन्स खारेज गरिएको जनाएको हो ।

नेपाल दूरसञ्चार प्राधिकरणबाट इन्टरनेट (ई–मेलसहित) सेवाको अनुमतिपत्र प्राप्त संस्था केसीएन नेटले नवीकरणका लागि नियमानुसार निवेदन पेश नगरेकाले स्वतः खारेज भएको जनाएको छ । अनुमतिपत्र दूरसञ्चार ऐन २०५३ को दफा २५ (५) बमोजिम स्वतः खारेज भएको प्राधिकरणले जनाएको छ ।

इन्टरनेट (ई–मेलसहित) सेवा सञ्चालन गरेबापत नियमअनुसार तिर्न र बुझाउन कुनै दस्तुर देखिएमा रकम तिर्न समेत प्राधिकरणले निर्देशन दिएको छ । अन्यथा बाँकी बक्यौता रकम प्रचलित कानून अनुसार असूलउपर गरिने प्राधिकरणको अनुमतिपत्र व्यवस्थापन शाखाले जनाएको छ ।