२६ जेठ २०८३, मंगलबार
नेपाली कांग्रेसका केन्द्रीय सदस्य डा. शेखर कोइरालाले फागुन २५ गते हुने राष्ट्रपति निर्वाचनमा कांग्रेसले उम्मेदवारी दिने र आफूहरुको उम्मेदवारले जित्ने दाबी गरेका छन् ।
कांग्रेसले अगाडि सारेको उम्मेदवारले जित्नेमा कुनै दुई मत नभएको उनको दाबी थियो ।
प्रेस युनियनको अधिवेशन उद्घाटन समारोहलाई सम्बोधन गर्दै कोइरालाले अन्य दलसँग सहकार्य गरेर राष्ट्रपतिको उम्मेदवारलाई जिताउने बताएका हुन् ।
‘तपाईंहरूलाई लागेको होला २५ फागुनमा के हुन्छ ? राष्ट्रपतिको निर्वाचन नेपाली कांग्रेसले उम्मेदवारी दिन्छ । उम्मेदवारी जिताउने लिन्छौँ । जित्ने कुरामा दुई मत छैन’, कोइरालाले भने, ‘अन्य दलसँग सहकार्य गर्नुपर्ने आवश्यकता देखेको छु, अहिले राष्ट्रपति निर्वाचन सन्दर्भमा जुन कुरा आइराखेको छ । त्यो विषयलाई लिएर सत्तामा रहेका केही दलले कांग्रेसले भाँजो हाल्न खोजेको भनेका छन् । हामी संसदको ठूलो पार्टी हो नि ।’
कोइरालाले राष्ट्रपतिमा उम्मेदवारी दिए पनि सरकारमा सहभागी नहुने बताए ।
‘हामी संसदको सबभन्दा ठूलो पार्टी हो, प्रतिपक्षको भूमिका खेल्छौँ, सरकारमा जाँदैनौ । सँगसँगै हामी गभरमेन्ट इन वेटिङ पनि हौं, यो कुरा सत्ता गठबन्धनका केही नेताहरूले बुझ पचाइरहेका छन्’, उनले भने ।
कोइरालाले न्यायपालिका सम्बन्धमा एमाले अध्यक्ष केपी शर्मा ओलीले प्रतिनिधि सभामा दिएको अभिव्यक्तिप्रति आपत्ति जनाए ।
