अमेरिकाको सियाटल नगर परिषद्की निर्वाचित अधिकारी क्षमा सावन्तले जात विभेद कानूनमा जातपातलाई पनि समावेश गर्ने अध्यादेश प्रस्ताव गरेको दी एसोसिएटेड प्रेसले खबर दिएको छ । 

एपीकी दीपा भरतले तयार पारेको सामग्रीमा उल्लेख भएअनुसार, पार्षदहरूले मंगलवार यस प्रस्तावलाई पारित गरेमा जातका आधारमा गरिने भेदभावमाथि प्रतिबन्ध लगाउने अमेरिकाको पहिलो शहर सियाटल हुनेछ । 

भारतमा जातका आधारमा गरिने विभेद अझै पनि कायम छ । अमेरिका पुगेका भारतीयहरूले पनि जातपातका आधारमा भेदभाव गर्ने गरेका छन् । 

विगत एक दशकयता दलित अभियानले डायस्पोराका विभिन्न कुनाबाट समर्थन पाइरहेको छ । हिन्दुज फर ह्युमन राइट्स जस्ता संस्थाले यसमा अग्रणी भूमिका खेलिरहेका छन् । 

आफूलाई दलित भनी चिनाउने व्यक्तिहरू विगत तीन वर्षमा सार्वजनिक रूपमा आफ्नो कथा बताउन थालेका छन् । 

त्यसरी सार्वजनिक हुने व्यक्तिमा प्रेम परियार पनि पर्छन् । धारा छोएको निहुँमा आफ्नो परिवारमाथि निर्घात कुटपिट गरिएको उनी सम्झिन्छन् । 

सन् २०१५ मा अमेरिका पुगेका उनले थरकै कारण त्यहाँ पनि भेदभाव सहनुपरेको थियो । आफूले दलितको हकहितका लागि अभियान चलाइरहेको उनी बताउँछन् ।