०६ असार २०८३, शनिबार
राष्ट्रपति तथा उपराष्ट्रपतिको निर्वाचनमा विधुतीय मतदान उपकरण (इलेक्ट्रोनिक भोटिङ मेसिन, इभीएम) को प्रयोग नहुने भएको छ । प्रमुख निर्वाचन आयुक्त दिनेशकुमार थपलियाका अनुसार मेशिन पुराना भएको र नयाँ खरिद गर्ने तत्काल कुनै प्रक्रिया नरहेकाले मेशिनको प्रयोग नहुने भएको हो ।
प्रमुख निर्वाचन आयुक्त थपलियाले भन्नुभयो, “पुरानो उपकरण काम लाग्ने अवस्थामा छैन, नेपालीले बनाएको प्रमाणीकरण भएको छैन, नयाँ खरिद गरेर प्रयोग गर्ने सम्भावना देखिन्न ।” राष्ट्रपतिको निर्वाचन फागुन २५ गते र उपराष्ट्रपतिको निर्वाचन चैत ३ गते हुँदैछ ।
गत वैशाख ३१ मा सम्पन्न स्थानीय तह निर्वाचन र मङ्सिर ४ गते सम्पन्न प्रतिनिधि सभा तथा प्रदेश सभा सदस्य निर्वाचनको पूर्वसन्ध्यामा आयोगले इभीएमको प्रयोगको सम्भाव्यताबारे अध्ययनसमेत गरेको थियो । तर सम्भाव्यता अध्ययनका लागि गठन गरिएको समितिले कानुनी अड्चन रहेको जनाएपछि स्थानीय र प्रतिनिधि सभा तथा प्रदेश सभा सदस्य निर्वाचनमा इभीएम प्रयोगको सम्भावना सकिएको छ ।
राष्ट्रपति तथा उपराष्ट्रपतिको निर्वाचनमा ८३१ मतदाता छन् । सीमित सङ्ख्यामा मतदाता रहने र एकै स्थानमा दुई वटा मतदान केन्द्र रहने हुँदा इभीएमको प्रयोग सम्भव देखिएको थियो । मत बदर नहुने, मतदान र गणना प्रक्रिया छिटोछरितो हुने हुनाले इभीएम खरिद महँगो भए पनि प्रयोग सहज हुने अनुमान गरिएको थियो । (गोरखापत्रबाट)
