काठमाडौं, १० भदौ– नेपाल राष्ट्र बैंकबाट ‘क’ बर्गको इजाजत प्राप्त एनआईसी एशिया बैंकले आफ्ना सेयरधनीलाई २१.०५ प्रतिशत लाभांस वितरण गर्ने भएको छ ।
बैंकले २० प्रतिशत बोनस शेयर र १.०५ प्रतिशत नगद लाभांस गरी २१.०५ प्रतिशत लाभांस वितरण गर्न लागेको हो ।
यही भदौ ३० गते बस्ने २० औं वार्षिक साधारण सभामा लाभांस वितरण प्रस्ताव पेश गरिने बैंकले जनाएको छ ।
काठमाडौंको बबरमहलस्थित कार्की पार्टी प्यालेसमा हुने २० औं वार्षिक साधारण सभामा लाभांस वितरसहित अन्य प्रस्ताव पनि पेश गरिने जनाइएको छ ।
एनआईसी एशियाले समग्र वाणिज्य बैंकको तुलनामा पनि गत आर्थिक वर्षमा निक्षेप र कर्जामा उच्चस्तरको परिणाम हासिल गरेको छ ।
गत आवमा समग्र बाणिज्य बैंकको निक्षेप १० प्रतिशत र कर्जा बृद्धि २० प्रतिशत रह्यो । तर एनआईसी एशियाले भने निक्षेपतर्फ २५ प्रतिशत र कर्जातर्फ २२ प्रतिशतको बृद्धि हासिल गर्यो ।
एनआईसी एशिया बैंकले वाणिज्य बैंकको बजारमा क्षेत्रमा आफ्नो हिस्सा समेत बढाएको छ । समग्र वाणिज्य बैंकहरुको गत वर्षको कुल निक्षेपमा यस बैंकले ३.७९ प्रतिशतको बजार हिस्सालाई सुधार गर्दै यस बर्ष ४.१५ प्रतिशतको बजार हिस्सा ओगट्न सफल भएको छ ।
साथै, गत आर्थिक वर्षको समग्र वाणिज्य बैंकहरुको कुल निक्षेप बृद्धिमा बैंकले ६.७ प्रतिशत हिस्सा ओगट्न समेत बैंक सफल भएको छ ।
बैंकले आफ्ना सेवाग्राहीको हितलाई मध्यनजर गर्दै कर्जा तथा बचत योजनाहरु सञ्चालन गरिरहेको छ । बैंकले आफ्ना बचतकर्ताहरुलाई बचत खातामा ९ प्रतिशतसम्म ब्याजदर प्रदान गर्दै आएको छ । जुन नेपाली बैंकिङ्ग क्षेत्रकै उत्कृष्ट र आकर्षक ब्याजदर भएको बैंकको दावी छ । यसैगरी बैंकले हालै मात्र सेयर धितो कर्जा प्रवाहलाई समेत निरन्तरता दिने निर्णय गरेको छ ।
बैंकले शाखा विस्तारको क्रमलाई गत बर्ष पनि निरन्तरता दिएको छ । जसअन्तर्गत बैंकले गत आर्थिक वर्षमा नेपाली बैंकिङ्ग इतिहास मै सबैभन्दा बढि अर्थात् ५३ वटा शाखा थप गरेको छ । थप शाखा विस्तारसँगै एनआईसी एशियाले हाल १२१ शाखा तथा ४ विस्तारित काउन्टर मार्फत् विभिन्न बैंकिङ्ग सेवा प्रदान गरिरहेको छ ।
