१० साउन २०८३, आइतबार
सिद्धार्थ उद्योग वाणिज्य संघ भैरहवा, रूपन्देहीको अध्यक्षमा ठाकुरकुमार श्रेष्ठ विजयी भएका छन् । शनिवार भएको निर्वाचनको आइतबार सार्वजनिक परिणामअनुसार श्रेष्ठ १ हजार १०७ मतका साथ विजयी भएका हुन् ।
उनका प्रतिस्पर्धी विजय पाण्डेले ६८७ मत मात्र ल्याएको निर्वाचन अधिकृत शिव गौडेलले जानकारी दिए । निर्वाचित श्रेष्ठ नेपाली कांग्रेसनिकट हुन् भने पाण्डे एमाले निकट हुन् ।
२ हजार १९३ जना मतदातामध्ये १ हजार ८२८ जनाले मत खसालेका थिए । सचिवबाहेक अधिकांश पदमा श्रेष्ठ प्यानलका उम्मेदवार विजयी भएका छन् । संघको वरिष्ठ उपाध्यक्षमा नेत्रप्रसाद आचार्य १ हजार २५५ मत ल्याई विजयी भए । उनका प्रतिस्पर्धी अरुण कुमार गोयन्काले ५४७ मत प्राप्त गरेका छन् । यस्तै वाणिज्य उपाध्यक्षमा गोविन्द ज्ञवाली १ हजार १२३ मत ल्याएर विजयी हुँदा रविकुमार श्रेष्ठले ६४३ मत पाए ।
उद्योग उपाध्यक्षमा दिलिपकुमार कान्दु ८९४ मत ल्याई निर्वाचित हुँदा प्रतिस्पर्धी हरिबहादुर थापाले ८७३ मत प्राप्त गरे । महासचिवमा कृष्ण प्रसाद घिमिरे ९६१ मत ल्याई विजयी भए । अर्का प्रत्यासी गोपाल भण्डारीले ८०४ मत प्राप्त गरेका छन् ।
कोषाध्यक्षमा कमलप्रसाद मरासिनी ८७७ मत ल्याई विजयी हुँदा उनका प्रतिस्पर्धी गौरव श्रेष्ठले ५१८ र गंगासागर अग्रहरिले ३६२ मत ल्याए । सचिवमा पाण्डे प्यानलका मंगल भण्डारी ९९२ मत ल्याई विजयी भएका छन् । भण्डारीका प्रतिस्पर्धी धर्मवीर शर्माले ७७९ मत पाएका छन् ।
वस्तुगत सदस्यमा प्रीतम रौनियार, उद्योगतर्फ खुला सदस्यहरूमा ओम जैसी, रमेश घिमिरे, रचना क्षेत्री, कमल ज्ञवाली र विष्णुमाया शर्मा पौडेल निर्वाचित भएका छन् ।
वाणिज्यतर्फ खुला सदस्यमा अर्जुन कार्की, प्रमोद रिजाल, विशाल जैसवाल, कृष्णप्रसाद अधिकारी, विरेन्द्र ज्ञवाली, दिनेशमान अमात्य, अभिनव मयुर कसौधन, धर्मराज आचार्य, मिना पन्थी र विजय अधिकारी विजयी भए ।
यस्तै कर्पोरेट उपाध्यक्षमा रोहितकुमार अग्रवाल, सहकोषाध्यक्षमा सञ्जयकुमार बेरीवाल, कर्पोरेट सदस्यमा अर्पित कुमार अग्रवाल र विकासकुमार गोयन्का तथा वाणिज्यतर्फ महिला सदस्यमा यमकला न्यौपाने र महिला उद्योग सदस्यमा पल्लवी न्यौपाने निर्विरोध निर्वाचित भएको गौडेलले बताए ।
