२९ असार २०८३, सोमबार
प्रदर्शनरत चलचित्र ‘छक्कापञ्जा ४’मा समावेश सहकारीबारेको संवाद (डायलग) हटाउन माग गर्दै चलचित्र विकास बोर्डमा निवेदन परेको छ ।
सहकारी अभियानको सर्वोच्च निकाय ‘राष्ट्रिय सहकारी महासंघ लिमिटेड’ले सोमवार विकास बोर्डमा निवेदन दिएको हो ।
सहकारी महासंघका अध्यक्ष मिनराज कंडेलद्धारा हस्ताक्षरित निवेदनपत्रमा ‘छक्कापञ्जा ४’मा सहकारीसम्बन्धि लाञ्छनायुक्त एवं नारी अस्मितामा खलल पुग्ने संवाद रहेकोमा गम्भीर ध्यानाकर्षण भएको उल्लेख छ । उक्त संवादको घोर भर्त्सना गर्दै भ्रम सिर्जना हुने उक्त संवाद तत्काल हटाउन सहकारी महासंघले माग गरेको छ ।
चलचित्रमा के छ सहकारीसम्बन्धि संवाद ?
‘छक्कापञ्जा ४’मा एकजना महिलासँग भएको समयमा राजा पात्रले बोल्ने एउटा संवाद छ – ‘श्रीमती भनेको बैंकको लोन हो । मेन्टेन गरेन भने घरबार लिलाम हुन्छ ।’
महिला पात्र सोध्छिन् – अनि म के नि ?
त्यसमा राजाको जवाफ हुन्छ – ‘सहकारी । भाग्न पछि सक्छ ।’ यति भनेपछि राजा पात्र त्यहाँबाट बाहिरिन्छ ।
यो संवाद टिकटकलगायतका सामाजिक सञ्जालमा केही दिनयता भाइरल छ । उक्त संवादलाई तत्काल हटाउन माग गर्दै सहकारी महासंघले चलचित्र विकास बोर्डमा निवेदन दिएको हो । यो संवादलाई लिएर सहकारीकर्मी समेत रहेका कलाकार मधुसूदन पाठक ‘सिते बा’ले पनि आपत्ति जनाउँदै आएका थिए ।
