भक्तपुर नगरपालिकाले सडक पेटी हडपेर व्यापार व्यवसाय सञ्चालन गर्दै आएका व्यापारीको सामान र मोटसाइकल जफत गरेको छ ।

सडक पेटीमा र सर्भिस ट्रयाकमा कुनै पनि सवारीसाधन बिक्रीका लागि नराख्न र सामान व्यापार व्यवसाय नगर्न नगरपालिकाले पटक–पटक निर्देशन दिँदा पनि अटेर गरेपछि मंगलवार नगरपालिकाले गरेको अनुगमनमा मोटरसाइकलसहित विभिन्न सामान जफत गरेको हो ।

नगरपालिकाको अनुगमन समितिका संयोजक राजकृष्ण गोराको नेतृत्वमा भक्तपुरको घलाते र चुनदेवीमा २५ वटा पसल अनुगमन गरी पसल बाहिर बाटो र पेटीमा बेचबिखनका लागि राखेका सामान र मोटरसाइकल लगायतका सवारीसाधन जफत गरी ल्याएको संयोजक गोराले बताए ।

अनुगमनमा ब्रदर्श रिकन्डिसन हबलाई बाटो र पेटीमा बिक्रीका लागि राखिएको मोटरसाइकल नराख्न पटक–पटक निर्देशन दिँदा समेत अटेर गेपछि बिक्रीका लागि राखेको मोटरसाइकल जफत गरी ३ दिनभित्र नगरपालिकामा हाजिर हुन निर्देशन दिएको उनले जानकारी दिए ।

अमरबत्ती इन्टरप्राइजेज प्रालि, ख्वप हार्डवेयर प्रालि, खोटा खाजा घर, युनिस्टल ट्रेडर्स, बागमती आर्टस्, आरबी निर्माण सप्लार्यस, एभरेस्ट अटोटेक एण्ड सप्लायर्स, ह्वाक्सी फर्निचर (डेकोर) प्रालिलाई ३ दिनभित्र दर्ता नवीकरण गरी नगरपालिकामा हाजिर हुन निर्देशन दिएको बजार निरीक्षक रामकृष्ण प्रजापतिले बताए ।

म्याद गुज्रेका सामान बिक्रीका लागि राख्ने कृष्ण किराना पसलमा पेय पदार्थ एवं खाद्य पदार्थ नष्ट गरिएको र श्रीलाल कोसवारको ग्रिल पसल तथा वर्कसप, रिचा भुसालको किराना पसल, सुस्मिता श्रेष्ठको साधारण जलपान पसललाई अनुुगमनकै क्रममा दर्ता गराएको उनले बताए ।