युक्रेनका शीर्ष सैन्य अधिकारीहरू बाखमुतमा रुसी आक्रमणका विरुद्ध डटेर लडिरहन प्रतिबद्ध रहेको युक्रेनक ाराष्ट्रपति भालोदीमीर जेलेन्स्कीले बताएका छन् । 

बाखमुतका विषयमा उनले सैन्य कमान्डसँग छलफल गरेका थिए । सैन्य अधिकारीहरू बाखमुत सहितको पूर्वी सेक्टरको प्रतिरक्षा गर्न एकमत रहेको उनको भनाइ छ । 

‘सबै सैन्य अधिकारीको अडान स्पष्ट थियो : यस सेक्टरमा सुदृढता देखाउने अनि आक्रमणकारीलाई अधिकतम क्षति पुर्‍याउने,’ जेलेन्स्कीले भिडियो सम्बोधनमार्फत बताए । 

युक्रेनको डोनेत्स्क प्रान्तमा रहेको बाखमुत नियन्त्रणमा लिनका लागि रुसीहरूले महिनौंदेखि कोशिश गरिरहेका छन् । 

यसमा नियन्त्रण कायम भएमा रुसलाई डोनेत्स्कका दुई ठूला शहर क्रामातोर्स्क र स्लोभियान्स्कतर्फ अघि बढ्न सहज हुन्छ । 

युक्रेनी सेनाप्रमुख भ्यालरी जालुज्नी बाखमुतको रणनीतिक महत्त्व उच्च रहेको बताउँछन् । 

‘शत्रुलाई रोक्नका लागि बाखमुतमा प्रतिरक्षात्मक कारवाही गर्नुको उच्च महत्त्व छ,’ जेलेन्स्कीसँगको बैठकमा उनले बताए, ‘समग्र युद्धपंक्तिको प्रतिरक्षालाई स्थिर बनाउन यो महत्त्वपूर्ण कारवाही हो ।’