०६ साउन २०८३, बुधबार
पोखरा महानगरपालिका १३ ले विभिन्न क्षेत्रका ७१ जना युवायुवतीलाई होटल तालिम दिएको छ ।
एक महिनासम्म चलेको तालिम पोखरा १३ को आर्थिक सहयोग र एभरेष्ट इन्स्टिच्युट अफ होटल म्यानेजमेन्ट प्रालिको प्राविधिक सहयोगमा सम्पन्न भएको हो ।
तालिममा सहभागी सबै प्रशिक्षार्थीलाई निःशुल्क तालिम प्रदान गरिएको अध्यक्ष किरण बरालले जानकारी दिए । उनका अनुसार तालिममा ४१ पुरुष र ३० महिला सहभागी भएका थिए । तालिममा युवायुवतीले बारिस्ता तालिम लिए । सहभागीलाई महेन्द्रपुलस्थित एभरेष्ट इन्स्टिच्युटले तालिम प्रदान गरेको थियो ।
‘तालिमले स्थानीय युवायुवतीलाई सीप सिकेर आत्मनिर्भर बनाइ थप जीवनयापन गर्न सहज विश्वास गरेका छौँ,’ उनले भने,’ सीप सिकौँ र आत्मनिर्भर बनौँ भन्ने अभियानका साथ तालिम आयोजना गरिएको थियो । ‘आगामी दिनमा थप यस्ता आत्मनिर्भर मुखी कार्यक्रम ल्याई स्थानीयलाई जीविकोपार्जनका लागि थप सहज बनाइने उनले प्रस्ट पारे ।
तालिममा सहभागी सबैलाई महानगरका शिक्षा प्रमुख हेमप्रसाद आचार्यले प्रमाणपत्र वितरण गरेका थिए । उनले वडाले यस्ता प्रोत्साहनमूलक कार्यहरू गर्नलाई सुझाए ।
‘युवाहरूमा गरेको लगानी खेर जाँदैन । लगानीलाई थप फलदायी बनाउन सबैजनाको सक्रियताको आवश्यक रहेको छ,’ प्रमुख अतिथि आचार्यले भने ।
