१० साउन २०८३, आइतबार
बंगलादेशी कम्पनी डुकाटुर टाइगरले ठेक्का पाएको इम्बोस्ड नम्बर प्लेटमा फेरि चलखेल हुन लागेको संकेत देखिएको छ ।
अंग्रेजीमा राखिएको यस्तो नम्बर प्लेट विवादमा आएको, समयमा नै उपलब्ध हुन नसकेको र सरकारले सेटिङमा ठेक्का दिएको भन्दै विरोध हुने गरेको छ ।
नेपालका सवारी साधनमा जडान गरिने भएकाले नेपालीमा इम्बोस्ड नम्बर राख्ने व्यवस्था हुनुपर्ने माग राखिएको भए पनि अदालतले अंग्रेजीमा राख्ने व्यवस्थालाई नै स्वीकृति दिएको थियो । तर, अहिले फेरि सरकारले नेपालीमा राख्ने प्रक्रिया अगाडि बढाएको छ ।
उपप्रधान, भौतिक पूर्वाधार तथा यातायात मन्त्री नारायणकाजी श्रेष्ठले यसअघि विविध कारणले अंग्रेजीमा राखिएको इम्बोस्ड नम्बरलाई अब नेपालीमा पनि राख्ने कार्ययोजना अगाडि बढेको बताए ।
उनले भने, ‘नेपालीमा इम्बोस्ड नम्बर राख्न सम्बन्धित एजेन्सीसँग छलफल भइरहेको छ । त्यसको कार्ययोजनालाई तीव्रता दिने तयारी भइरहेको छ । सरकारले छिट्टै इम्बोस्ड नम्बरलाई नेपालीमा पनि राख्ने छ ।’
सरकारले २५ लाख सवारी साधनमा इम्बोस्ड नम्बर जडान गर्न ५ वर्षअगाडि नै बंगलादेशी कम्पनीलाई छपाइको ठेक्का दिएको थियो । उक्त कार्य अहिलेसम्म न्यून रहेको छ ।
